Shillong, Nailur 15
Ka North Liberty Higher Secondary School kan sdang ïa ka jingïalehkai kaba nyngkong ha ka 64th Interna-tional Subroto Mukherjee Football Cup 2025 pyrshah ïa ka kynhun kaba na Chhattisgarh ha ka sngi Ba-ar ha ka por 6:30 mynstep ha Subroto Park Football Ground kaba ha nongbah Delhi.
Kane ka kynhun ïalehkai Under-17 boys na West Jaiñtia Hills kaba la mihkhmat ïa ka Jylla, ka la don ha ka Pool-H ha kaba la kynthup lang ruh ïa ki kynhun kaba na Kerala bad Delhi.
Kat kum ka prokram ba la pyllait da ki bor pynïaid katei ka lympung, la ong ba ka North Liberty ka dei ban ïakhun ha ka por 10:30 mynstep, hynrei na ka liang u coach kane ka kynhun u Bah Dapmon Tariang u la ïathuh ba la pynkynriah noh sha ka por 6:30 mynstep.
“Ngi sngewkmen ba baroh ki khynnah ïalehkai hapoh ka kynhun ki long kiba biang ha ka rta jong ki bad ym shym la don uwei ruh u ban palat ïa ka snem ba la buh,” u la bynrap.
Kumba ka paw katei ka kynhun ka la long ba la pynkhreh bha na ka bynta katei ka lympung namar ka dei ka sien kaba nyngkong ïa ka North Liberty ban mihkhmat ïa ka Jylla sha katei ka lympung.
Lah ban pynkynmaw ba ka jingïoh rung ka North Liberty sha katei ka lympung ka la wan urlong hadien ba ka rah ïa ka nam lahduh ha ka State Level Subroto Mukherjee Football Cup 2025 hadien ba ka la lah ban pynliem ia ka Nongjri Presbyterian SS na Ri-Bhoi da 1-0 kol.
