Shillong, Nailur 15
Ka kynhun ki nongsiat suloi ka Jylla hapoh ka lama jong ka Shooting Association of Meghalaya (SAM) ki la wanrah burom ïa ka Jylla da kaba ka la wan ba-ar ha ka 12th North East Zone Shooting Championship Rifle Pistol 2025 kaba la poi sha kaba kut ha ka lah sngi U Blei ha Aizawl, Mizoram.
Kane ka kynhun ka la khur 61 tylli ki takma, katba ka Mizoram ka la khur 67 tylli ki takma na ka bynta ban long ka lahduh ha kane ka lympung bad ïa ka kyrdan balai la ïoh da ka Assam, kaba la khur 36 tylli ki takma. Kiwei pat kiba la wan ha ka kyrdan basaw shaneng ki long ka Nagaland (10), ARMU (8), AMU (5) bad ka Arunachal Pradesh (1).
Kane ka lympung shi bynta ban plie lad ïa ki nongïalehkai ba kin pyni ïa ki sap ba kyrpang jong ki na kylleng ka thaiñ shatei lammihngi. Ki la don haduh 258 ngut ki nongïalehkai kiba la wan shim bynta na Arunachal Pradesh, Assam, Manipur, Mizoram, Meghalaya, Naga -land bad kynthup lang na ka Army Marksmanship Unit (AMU) bad ka Assam Rifles Marksmanship Unit (ARMU).
Ha kane ka kynti kaba mynta ka Meghalaya ka la lah ban sei ïa san ngut ki nongïalehkai kiba don jingduna ha ki dkhot met. Kine ki nongïalehkai ym tang ba ki la ïakhun ryngkat bad kiwei pat, hynrei ki la lah ban pynpaw ïa ka jingtbit ha ka jinglehkai jong ki, ha kaba la ïoh ka lad ban mihkhmat ïa ka Jylla ha ka All India Deaf Shooting Competition ka ban sa long shen.
Katei ka kynhun ïalehkai ka Jylla ka la shim bynta ha ka Sub-Youth, Youth, Junior, Senior bad ka kyrdan Masters ha kaba ki la lah ban pynpaw ïa ka jingtbit jong ki. Hynrei kiba bun na ki takma ki la wan lyngba ki nongïalehai na ka kyrdan Sub-Youth, Youth, bad Junior.
Ha katei ka sngi pynkut la ïadon lang ki heh ki haiñ kiba kynthup ïa u Myntri Rangbah ka Mizoram u Lalduhoma, u Kalikesh N. S. Deo, President ka National Rifle Association of India (NRAI), Bah John F. Kharshiing, Vice President ka NRAI bad kiwei kiwei.
Na ka liang ka SAM ka la pynpaw ka jingkhublei ïa ka tnat ïalehkai kaba la ai jingkyrshan halor kane ka jingleit shim bynta sha katei ka lympung.
