Jowai, Nailur 16
Ka Mookymphad bad ka NSA ki la khur jingjop ha ka 3rd Division bad 2nd Division Football Tournament ba la pynïaid da ka West Jaiñtia District Sports Association (WJDSA) ha ka sngi Ba-ar ha Kiang Nangbah Stadium.
Ha ka jingïalehkai 3rd Division, ka Mookymphad SC ka la pynliem noh ïa ka Saiñdur Mihmyntdu da 5-1 kol. Ïa kine la thep da u Humbertson Rymbai (25), Wailad Shylla (38), Honesty Phawa (42), Jerry Dhar (57) bad u Kenal Dkhar (77). Katba na ka Saiñdur Mihmyntdu la ïarap pynthep da u rangïalehkai ka liang pyrshah u Dapyrkhat Suchiang (64). Ha ka jingïakhun kaba bud, ka Riatsaliya Mihmyntdu ka la jop da 2-1 kol ïa ka Lumsliarsliar Mupliang. U Meban Kharsotti u la thep ar kol ha ki minit 17 & 65, katba na ka Lumsliarsliar Mupliang la thep da u Spain Rymbai ha ka minit 42.
Lyngba kine ki nam jop, ka Mookymphad SC bad ka Riatsaliya Mihmyntdu ki la jam sha ka quarter final.
Ha ka jingïalehkai 2nd Division, ka NSA kala jop da 5-1 kol ïa ka Panaliar. U Teibor Lamare u la thep ar kol ha ka minit kaba 20 & 27, ha kaba la bynrap da u Ram Hadia (43), Heini Pasi (53) bad u Angel Dhar (67). Katba ïa ka shi kol na ka bynta ka Panaliar la thep da u Iatha Phira (60).
