Shillong, Nailur 16
U Lat ka Jylla u CH Vijayashankar ha ka sngi Ba-ar u la ïoh ban pynbam smai ïa ki phra ngut ki Myntri ba thymmai jong ka Sorkar Megha-laya Democratic Alliance (MDA-II).
U Myntri Rangbah ka Jylla u Conrad K Sangma, u la wanrah ïa ka jingpynkylla ïa ka Kynhun Myntri da kaba weng noh haduh 8 ngut ki Myntri kum ka sienjam ban ai bynta lem ïa kiwei ba kin bat ïa ka shuki Myntri ha ka Sorkar MDA-II hadien ba la kynjoh arsnem shiteng.
Napdeng ki Myntri kiba shah pynhiar shuki, saw ngut ki dei na ka National People’s Party, ar ngut na ka United Democratic Party bad mar uwei na ka HSPDP bad ka Bharatiya Janata Party.
Na ka NPP, ki MLA kiba la shimti bujli ïa ka shuki Myntri ha ka Sorkar MDA-II ki kynthup ïa u MLA ka Resubelpara u Timothy D Shira, u MLA ka Dalu u Brening Sangma, u MLA ka Jirang Bah Sosthenes Sohtun bad u MLA ka Jowai u Bah Wailadmiki Shylla kiba dei na ka NPP. Kine kila shimti ïa ka shuki na u AT Mondal, Rakkam A Sangma, Kong Ampareen Lyngdoh bad Bah Comingone Ymbon.
Katba na ka UDP kiba la shimti ïa ka shuki Myntri ki long u MLA ka Mairang u Bah Metbah Lyngdoh uba dei ruh u President ka UDP bad u MLA ka Amlarem u Bah Lahkmen Rymbui ha ka jaka jong u Bah Paul Lyngdoh bad Bah Kyrmen Shylla.
Na ka HSPDP, u MLA ka Mawshynrut Bah Methodius Dkhar u la shimti ïa ka shuki Myntri da kaba ïabujli bad u Bah Shakliar Warjri.
Katba na ka BJP, u MLA ka South Shillong Bah Sanbor Shullai u la shimti bujli ïa ka shuki Myntri na u Bah AL Hek.
Katba kiba u Myntri Rangbah ka Jylla u Conrad K Sangma u dang pynneh ïa ka shuki, ki long ïa ki Symbud Myntri Rangbah kata tang u Bah Prestone Tynsong, Bah Sniawbhalang Dhar bad ruh ïa u Myntri ka tnat PHE u Marcuise Marak.
Ha kane ka jingpyntian smai la ïadon lang naduh u Myntri Rangbah u Conrad K Sangma, ki symbud Myntri Rangbah u Bah Prestone Tynsong bad u Bah Sniawbhalang Dhar, u Chief Secretary ka jylla u Bah DP Wahlang, ka DGP Kong I Nongrang, ki MLA, ki heh ophisar Sorkar lem bad ki bahaïing hasem jong ki Myntri ba bam smai nalor kiwei kiwei.
