Shillong, Nailur 16
Ki nongïalam ka All Khasi Meghalaya Tourist Taxi Association ki la ïaid shakhmat ban pynlong ïa ka jingïakhih jong ki ban dawa na ka Sorkar ba ka dei ban thaw lad ban ym shah ïa ki kali kamai bar jylla ba kin leit buh beit-beit ïa ki nongwan jngohkai ha ka Jylla.
Ki dkhot ka synjuk ki la pynlong ka jingap ïa ki kali ba wan nabar naduh ka por 5 baje mynstep ha kylleng bad pynsangeh ïa ki kali ban pynsngewthuh bad sam da ki kot lyngkdop ïa ki nongñiah kali bad ruh ïa ki nongwankai ha kaba ïadei bad ka jingïakhih jong ki.
Haba ïakren bad ki nongïalam ka ‘Association’ ki la pynpaw ba ki hap ban leh da kane ka sienjam namar ba ka Sorkar ka khlem leh eiei ïa ka jingdawa jong ki.
Ki la pynpaw ba ki ïoh kamai tang lai sien ha ka shitaïew, katba ki kali kiba wan nabar pat ki wan man ka sngi, kane ka long ba kiba nabar ki la wan ban knieh noh ïa ka kamai jong ki.
Ki nongñiah kali ki la pynpaw ba ki kam ki jam ki bun kyrhai hapoh ka Jylla da ka jingriewspah ka Jylla ba ka don ki jaka jngohkai ba khring ïa ki nongwankai, hynrei namar ka jingbym biang ki kyndon, kiba nabar ki ïohlad ban knieh noh ïa ka kam ba ki trai ri trai muluk ki dei hok ban ïoh kamai.
Ki la buh ka jingkyrpad ïa ka Sorkar ba kan sngap lem ïa ka jingdawa jong ki.
