Shillong, Nailur 16
U khlieh nongïalam ka United Democratic Party (UDP), Bah Metbah Lyngdoh u la ong ba ka rai jong ka seng haba ïadei bad ka jingbujli Myntri ka dei ka sienjam kaba long shi bynta na ka jingpyrshang kaba (kham) ïar ban ïasam ïa ki jingkitkhlieh hapdeng ki nongthaw aiñ jong ka seng.
Ka UDP ka don 12 ngut ki MLA ha ka Ïingdorbar kaba 60 ngut ki nongmihkhmat.
Haba kren hadien ba la shah pynsmai kum u Myntri Sorkar, u Bah Lyngdoh u la ong, “Ngi don hangne ban ïaid shakhmat bad ban don ryngkat bad u Myntri Rangbah bad ban bteng bad ka jingïaid lynti jong ka MDA 2.”
Haba kylli ïa ka daw halor ki arngut ki Myntri, u Bah Lyngdoh u la ong, “Kam don daw ban pynhap ïano-ïano ruh, hynrei ka dei ka jingsam ïa ki jingkitkhlieh bad nga sngew ba kata ka dei ka sienjam kaba dei bad kaba biang katkum ka jingsngew shimet jong nga – kaba la pynpaw ruh da baroh ki dkhot ba la shah jied bad ka seng baroh kawei.”
U la pynshai shuh-shuh ba kam shym la don kano-kano ka jingïateh kular ban ïasam ïa ki kam hadien ar snem shiteng.
“Ngim pat ju don kano-kano ka jingïateh, ym pat ju don wat ha ki por ba la leit noh ruh, kumta kam shym la long kaba donkam ban don ka jingïateh,” u la bynrap.
U Bah Lyngdoh u la ban jur ba ka UDP ka dei ka seng kaba ïatylli bad kan ïai bteng ban long kumta.
“Ban ïa shai bha, kumba long mynta, bad nga ngeit ba wat ha ki por ban wan ruh, ka seng baroh kawei, ngi long kawei, kam don kano-kano ka jingïapher ne kaei-kaei kaba phi ong. Ngi ïatylli bad ngin ïai bteng ban ïatylli kum kawei,” u la ong.
U Bah Lyngdoh u la pynshai ba ïa kane ka rai ban bujli thymmai ïa ka Kynhun Myntri la shim hadien ba la ïasyllok bad baroh kiba don bynta, kynthup ïa ki MLA, ki MDC, bad ki nongkitkam ka seng.
“Nga la kren shai bha ba kane ka dei ka jingsngew jong baroh ki nongshim bynta jong ka seng, naduh ki MLA, ki MDC, ki nongkitkam ka seng, kiba dei shi bynta jong ka jingpyntreikam, bad ngi la kynthup lang ïa baroh na ka bynta kano-kano ka jait kam, bad da kawei ka jingmut, la shim ïa ka rai,” u la bynrap.
Haba kylli halor ka jingbym don lang jong u Bah Paul Lyngdoh ha ka jingïalang pyntian smai ïa ki Myntri, u Bah Lyngdoh u la ong ba u (Paul) don katto-katne ki kam kiba u hap ban pyndep namar ka sngi khatduh jong u kum u Myntri.
“Mynta ka sngi ka dei ka sngi kaba khatduh ïa u kum u Myntri, ki don katto-katne ki kam kiba u hap ban pynbeit, kumta um shym la lah ban ïadon lang ha kane ka jingïalang bam smai,” la pynshai u Bah Lyngdoh.
