Washington, Nailur:
Hapdeng ka jingpyrkhing bad jingpynshitom beiñ jong u President ka America, u Donald Trump, halor ka jingwan buhai shnong, ka Harjit Kaur, ka kmie tymmen kaba dei na India, kaba 73 snem ka rta, ka la shah kem ha ki bor jong ka Immigration and Customs Enforcement (ICE) ha California, ha ka por ba ka leit ban jurip man ka por bad katei ka tnat treikam. Ka Kaur, kaba la sah ha America, la palat 30 snem, kam shym la don kano kano ka jingthoh bad ka la “pyntip da ka jingshaniah” sha ka ICE man la ka hynriew bnai, la palat 13 snem, ong ki bahaiing jong ka.
La kem ia ka “khlem jingmaham” ha ophis jong ka ICE ha San Francisco ha ka sngi Nyngkong ba la dep, haba ka la leit sha katei ka jaka ban aiti ia ki katto katne ki kot ki sla ba la pan da ka ICE, ong ka khubor jong ka Fox KTVU.
Ha ka taïew ba la dep, ka kynhun kaba heh, ka la ïalum lang ha El Sobrante ban pyni ïa ka jingkyrshan ïa ka Kaur, kaba la sah la slem bha ha Hercules. Ha ki dur jong ka jingïakhih ba la pynpaw online, la ïohi ïa ki nongïakhih ba ki rah ïa ki dak kiba thoh “Ka Harjit Kaur ka dei jong kane ka jaka, ka ICE kam dei”, “Ki kti na ka kmie tymmen jong ngi”, bad “Kam dei ka nongleh kam sniew.”
Ka Harjit Kaur, kaba don ia 2 ngut ki khun ksiew shynrang bad 3 ngut ki khun ksiew kynthei, ka la wan sha America ha u snem 1992 na India kum ka kmie kaba shong marwei bad arngut ki khun shynrang. Ka la sah ha ka Bay Area naduh katei ka por, haduh mynta, bad ka la trei kum ka nongsuh jaiñ ha Sari Palace ha ka surok bah University Avenue jong ka Berkeley la palat arphew snem mynta.
Ka khun ksiew jongka, ka Sukhdeep Kaur, ka la batai ia ka kum ka dur jong ka jingphohsniew jong ki nong America. Ka long ka kmie tymmen jong baroh lang – ka kmie kaba laitluid, kaba bym shym la pyrkhat tang ialade bad kaba trei shitom trei minot bha,” la iathuh ka Sukhdeep Kaur ha ki nongthoh khubor.
Ha u snem 2012, ka sorkar US, ka la kyntait ia ka Harjit Kaur, hadien kata, kam shym la kyntait satia ban wan phai sha India, katkum ka jingong jong ka pyrsa kurim jongka, ka Manji Kaur, kaba la kam ba ka kmie tymmen jongka, ka la pan bunsien ia ki kot ki sla leit jingleit na Indian Consulate, hynrei la kyntait ia ka.
