Shillong, Nailur 16
U MLA ka Jowai Constituency Bah Wailadmiki Shylla u la pynbna ba ïa ka tulop kaba nyngkong kaba shibnai kum u Myntri ha ka Sorkar Jylla un phah sha ki hynñiew tylli ki jaka ri khunswet kiba don ha West Jaiñtia Hills District.
U Bah Wailad u la pynbna ïa kane hadien ba u la dep ban bam smai kum u Myntri ba thymmai ha ka Sorkar MDA-2 kaba la long ha ka sngi Ba-ar ha ïingsah u Lat ka jylla.
U Bah Wailad u la ong, kane ka jingnoh synñiang sha ki jaka ri khunswet ka long ban ai burom ïa U Blei uba la plie ka lad ïa u ban shimti kum u Myntri Sorkar.
“Nga kwah ba ki samla kin tip ïa ki skhim kiba ka Sorkar ka la ai, ngan pyrshang ban trei shitom ban wanrah ïa ka jingïatreilang ha ka imlang sahlang khamtam ka jingma u drok bad ngan dei ma nga ban ïalam nakhmat ban ïakhun ïa ka jingpynsniew kaba la wan sha ki khun samla,” u la ong.
U la ong ba ka jingbujli Myntri mar ar snem shiteng kan dang pynkhlaiñ shuh shuh ïa ka NPP ha u snem 2028.
Katba u Bah Sosthenes Sohtun, u MLA ka Jirang uba dang shu dep bam smai kum u Myntri ba thymmai ka Sorkar Jylla u la ong, ki MLA ki hap ban trei bha ha ki konstitwensi bad hapoh ka jylla na ka bynta ban lah ban sei biang ïa ki nongïalam jong ka jylla ne ban long kum u Myntri Rangbah ka jylla na Ri-Bhoi District.
U la ïathuh ba kane ka jingïoh ban shimti kum u Myntri ha ka Sorkar Jylla ka dei ka jingrai jong u Myntri Rangbah ka jylla bad u kwah ban trei kham bha ïa ka konstitwensi bad ïa ka jylla baroh kawei.
Katba u Bah Methodius Dkhar uba dei u MLA na Mawshynrut Konstitwensi uba dang shu dep bam smai kum u Myntri ba thymmai na ka bhah jong ka HSPDP u la ong, un nym khmih lynti ïa kaba sniew kumba la jia ha ka samoi ba la dep hynrei kane ka jingïabujli Myntri kan dang pynkhlaiñ ïa ka HSPDP ha u snem 2028 ha ka jingïatreilang bad u MLA ka Mawthadraishan Bah Shakliar Warjri bad ki nongkitkam ka HSPDP.
U la ong ba kum u Myntri un ïatreilang bad ka HSPDP ban pynurlong ïa ka jingangnud u Maieid H.S Lyngdoh ban pynurlong ïa u pud u sam, ka ktien Khasi bad ïa ka ILP.
