Washington, Nailur:
U President ka America, U Donald Trump, u la leh pyrshah halor ka jingshah pyniap ba shyrkhei jong u Chandra Nagamallaiah, u nong India, uba la shah khrai khlieh ha u nongwan buhai shnong na Cuba, uba khlem kot don sla, ha ka taiew ba ladep ha Dallas, Texas. U Trump u la kular ban pynngat ia u nongshah kynnoh haduh katno ka aiñ da kaba pynngat ia u hapoh ki kyndon pynkheiñ aiñ ba nyngkong jong ka jingpyniap briew. U la kular ruh ban pynlong biang ia ka “America kaba shngaiñ sa shisien” bad u la ong ba ka jingsynshar jong u kan ym long kaba “jem” ia ki “nongleh kam sniew kiba wan buhai shnong” bad kiba shu shong be-aiñ hapoh ka ri.
Nga tip ïa ki khubor kiba shyrkhei ha kaba ïadei bad ka jingshah pynïap jong u Chandra Nagamallaiah, u briew uba don burom bha ha Dallas, Texas, uba la shah khrai khlieh da kaba shyrkhei, ha khmat ka kurim bad u khun jong u, da u nongwei u nongwei uba na Cuba u bym dei satia ban don ha ka Ri jong ngi,” u la ong ha ka post ha ka Truth Social platform jong u.
Ha ka 10tarik Nailur, u Nagamallaiah uba la 41 snem ka rta u la shah thombor haduh katta katta bad shah khrai khlieh ha Downtown Suites motel kaba don ha Samuell Boulevard ha Dallas. U Yordanis Cobos-Martinez, uba dang 37 snem ka rta, ula shah kem bad shah pynngat ha ki kyndon aiñ Capital Murder. La kynnoh ba u la khrai ia ka khlieh jong u Nagamallaiah bad ieh ia ka khlieh jong utei u briew ha ka jaka bret niut.
U Trump u la kynnoh ïa ka sorkar Biden barim ba ka la pyllait ïa u Martinez uba la shah kynnoh pynïap briew, uba dei u nongwan buhai shnong khlem kot don sla bad uba don ka histori jong ka kam runar, sha ka imlang sahlang.
Une u briew u la shah kem mynshuwa namar ki kam runar kiba shyrkhei, kynthup ïa ka jingshah lehbeiñ ki khynnah, ka jingtuh ïa ki kali heh, bad ka jingshah set phatok thok, hynrei la pyllait biang ïa u sha ka Ri jong ngi hapoh u Joe Biden uba khlem tbit namar ba ka Cuba kam kwah ïa kum une u briew uba sniew ha ka Ri jong ki. To sngewskhem, ka por ban long kiba jemnud halor kine ki nongleh kam sniew kiba wan rung be-aiñ ka la kut noh hapoh ka jingpeit jong nga!” la bynrap biang u Trump.
