Mawkyrwat, Nailur 16
Ka Hynñiewtrep Youth Council (HYC) Ranikor Circle hapoh ka jingïalam u President samla Billy Kharlartang ryngkat ki dkhot ha ka 13 tarik u Nailur, 2025 kila hiar jurip ïa ka Veterinary Centre kaba don ha ka shnong Nongnah, South West Khasi Hills District ka bym shym la trei kam satia hadien bun tylli ki snem ba la dep ban tei ïa ka.
Ka jinghiar jurip ka seng kadei hadien ba ka la ïoh jingujor na ki paidbah nongshong shnong halor ka jingbym treikam jong kane ka ophis la bun tylli ki snem naduh ba la dep ban tei ïa ka.
Ka seng ha kane ka jingjurip ka la pynpaw ïa ka jingsngewkhia ban lap ba bun na ki ïit ha kane ka ‘centre’ ki la pait lut bad ki kamra ruh bun ba ki la sdang ban jot.
U samla Billy Kharlartang lyngba ka kyrwoh khubor u la ïathuh ba ïa kane ka Veterinary Centre la dep ban tei ïa ka naduh u snem 2015 hynrei kaba sngewsih ka long ba haduh mynta kam shym pat la trei kam satia.
Kumta na ka liang ka seng ka kyntu ïa u MLA/MDC ka Ranikor Konstitwensi u Bah Pius Marweiñ ba un shimkhia lem ïa kane ka kam khnang ban lah ban plie noh ïa kane ka Veterinary Centre ba kan long shisha ka jingmyntoi ïa ki paidbah ka dong ka thaiñ khamtam ïa ki nongrep kiba ri ïa ki jingri.
