Nongstoiñ, Nailur 16
Ha ka sngi Saitjaiñ jong ka taïew ba la lah u MLA ka Mawshynrut Konstitwensi, u Bah Methodius Dkhar, u la ïoh ban pyllait paidbah ïa ka MLA skhim ka jong u lyngba ka SRWP ban sam ïa ki tin sop ïing sha ki paidbah nongshong shnong ka konstitwensi ha kaba kila don haduh kumba 1095 tylli ki longïing kiba la ïoh jingmyntoi lyngba katei ka skhim sam tin sop ïing.
Ïa ka jingïalang la ïoh ban pynlong hapoh ka ophis jong ka Mawshynrut C&RD Block ha kaba la ïadon ryngkat lang ruh u BDO Bah R Kharkongor, u MDC ka Mawshynrut Bah S Rashir, ki nongïalam ka HSPDP bad ki paidbah kiba dei ki nongïoh jingmyntoi.
U Bah Methodius Dkhar haba kren bad ki lad pathai khubor u la ong, kitei ki tin bala ïoh ban sam kidei lyngba ka SRWP bad na ka ‘CM Hap’ kiba dei jong u snem 2023-24 bad 2024-25 bad baroh ki tin kiba la ïoh ban sam ha katei ka sngi ki long haduh kumba 3285 ban.
U la ong ruh ba kum MLA ka thaiñ, ki jingmyntoi ïa ka konstitwensi kim da dei eh tang ka ban shu sam tin sop ïing hynrei shibun kiei kiei kiba u la pyrshang ban wanrah na ka bynta ka jingmyntoi bad ka bit ka biang jong ka konstitwensi hi baroh kawei.
Shuh shuh u la kyntu ruh ïa ki paidbah kiba la ïoh pdiang ïa kitei ki tin ba kin pyndonkam hok bad ha kajuh kapor ïa kito ki bym pat ïoh ba kin ïaishah namar kin sa ïoh ha ki snem ban wan.
