Shillong, Nailur 16
U Myntri Rangbah ka Jylla, u Conrad K. Sangma u la pyntikna ba shen yn sa pynngat bad pynshitom ïa ki runar kiba donkti ha ka jingpynïap ïa i heprit ba 4 snem ka rta ha Nongrah-Nonglum katkum ki kyndon jong ka aiñ.
Haba kren sha ki lad pathai khubor ha ka Sngi Ba-ar, u Sangma u la pynpaw ïa ka jingsngewlem kaba khraw sha ki bahaïing hasem jong ine i heprit iba la khlad noh.
U la pynpaw ïa ka jingkyrmen skhem ha ka jingtohkit jong ki pulit, da kaba kdew ba ki bor pynïaid ki trei palat por ban lap ksai haba ïadei bad kane ka jingjia.
“(Nga pynpaw) ïa ka jingsngewlem kaba khraw sha ki bahaïing hasem namar kaei kaba la jia kam long satia kaba dei,” u la ong.
Da kaba pyntikna ba ki pulit ki trei palat por ban lap ksai halor kane ka jingjia, u Myntri Rangbah u la ong, “La pyntip sha nga da u Symbud Myntri Rangbah ka Jylla ba ki la ïaid shaphrang ha ka jingtohkit baroh kawei. Ngan ym lah ban kren shaphang kata ïa mynta namar ba ka dang don hapdeng ka jingtohkit hynrei u Symbud Myntri Rangbah ka Jylla u la pyntip ïa nga ba ka jingtohkit ka la ïaid shaid-shaid shakhmat bad shen ngin sa lah ban lap ksai halor kane ka jingjia.”
Lah ban kdew hangne ba i heprit Insaphira Lyngdoh Mawnai i la jah rngai na ïingsah jong i kaba ha Nongrah-Nonglum ha ka step Sngi U Blei. La lap ïa ka met jong i kaba la thiah pyllup ha kawei ka jaka kaba lang um jong kawei ka ïing kaba dang shna thymmai kaba hajan ka ïingsah jong i ha ka step Lah Sngi U Blei.
Haba ïadei bad kane, ki pulit ka East Khasi Hills ki la thaw ïa ka kynhun Special Investigation Team (SIT) ban tohkit halor katei ka jingjia.
Ïa kane ka SIT, yn khlieh da u SP (City), u Bah Herbert Kharkongor, hapoh ka jingkhmih bniah ba kyllum jong u SP ka East Khasi Hills District.
Na ka liang ki pulit ki dang tohkit ïa ki sakhi bad ki dang lum ïa ki sabut ban pynithuh ïa u/ki runar kiba donkti ha kane ka kam sniew kaba shyrkhei.
