Shillong, Nailur 16
Uwei u heprit uba dang 7 snem ka rta u la lait salit na ki kti ki suba riewsniew hadien ba ki la pynbiej ïa u da kaba khroh ban shong kali bad ki watla um ithuh satia ïa kine ki briew.
Kane ka jingjia ka la jia ha ka lah sngi u Blei, ha ka shnong Lad Mawreng, Mawphlang Block, East Khasi Hill District.
Haba ïoh ban ïakren bad une u heprit u la ïathuh ba, ha ka janmiet 15 tarik Nailur katba u dang wan na jaka khreh kot (Tuition) ban leit sha ïing u la ïakynduh ïa kawei ka kali rong ïong ha shiteng lynti ba la shong da arngut ki briew ki ba u khlem ïthuh satia bad kiba la khot ïa u ban leit shong ha ka kali jong ki.
U heprit u la ïathuh ba, kitei ki briew ki ba shong ha katei ka kali ki la ong ba u kpa jong u, u don hapoh katei ka kali, katba utei u heprit u la jubab ba u kpa jong u, u dang leit trei bad mar-mar u la mareh sha ïing ban leit ïathuh ha ka meiieid jong u.
Haba ïoh ban ïakren bad ka meiieid, ka la ïathuh ba ha ka por kumba 5 duna eiei, u khun ksiew jong ka u wan ha ïing bad u ïathuh ba ki don ki briew kiba shong ha kali rong ïong bad ki khot ïa u ban shong ha ka kali jong ki.
Haba ïadei kane ka jingjia la ïoh ruh ban ïakren bad u Rangbah Shnong ka Shnong Lad Mawreng, u Bah C Kurbah u la ong ba u la ïoh jingtip ïa katei ka jingjia hynrei u la ong ba ym pat lah ban pynthikna.
U Bah Kurbah u la kyntu ïa ki kmie ki kpa ba kin peit bad phikir bha ïa la ki khun namar ba ka shnong jong ki ka long ka shnong kaba don harud surok bah. Kumjuh ruh u la phah ka khubor sha ka sorkar ba kan pynïoh CCTV ha man la ki lad jong ka shnong, khnang ba lada don kum kine ki jingjia hapoh ka shnong ka thaw kan kham pynsuk ban lap dien ïa kiba donkti.
Shuh-shuh u la ïathuh, ki bor pulit haba ïoh jingtip ïa kane ka jingjia ki la ïakynduh ïa u bad ïa ki bahaïing jong u heprit ban tip khambniah kane ka jingjia.
