Shillong, Nailur 16
Ka Mylliem Lum ka la pynliem noh ïa ka Sohryngkham da 1-0 kol ha ka quarter final kaba nyngkong jong ka Second Division Football League 2025 ba la pynïaid da ka Shillong Sports Association ha ka sngi Ba-ar ha SSA Stadium kaba ha First Ground, Polo.
Kane ka nam jop ka la wan urlong lyngba u Shaitborlang Kharkrang ha ka minit kaba 84 na ka bynta ban pynlong ïa ka Mylliem Lum ban jam sha ka semi final.
Ka Mylliem Lum kaba la bat ïa ka kyrdan ba hakhlieh ha ka Group-A bad kane ka long ka jingjop kaba san ha kane ka aïom. Katba ka Sohryngkham ka la ïoh rung sha ka quarter final hadien ba ka la wan ha ka kyrdan ba-ar ha ka Group-C.
Ha kawei pat jingïalehkai jong ka jingïaknieh lait hiar (relegation group), ka Umphyrnai ka la pynliem noh ïa ka Umpling da 2-1 kol. U Badon Rapsang u la thep ar kol ha ka minit kaba 12 & 45+1, katba u Elson Suting (27) u la pynphai kylla na ka bynta ka Umpling.
Ka Umphyrnai, Umpling bad ka Umphrup kin hap ban ïakhun tyngeh namar ar tylli kin shah pynhiar kyrdan sha ka Third Division na ka bynta ka aiom ka ban wan.
Ka jingïalehkai quarter final kaba ar ha ka sngi Balang kan long hapdeng ka Laitkyrhong pyrshah ïa ka Tynring ha ka por 4:15 nohphai sngi.
