Shillong, Nailur 16
Ka North Liberty Higher Secondary School ka la sdang da ka jingjop ha ka jingïalehkai ba nyngkong jong ka 64th International Subroto Mukherjee Football Cup 2025, hadien ba la lah ban pynliem ïa ka RKM Academy kaba na Chhattisgarh da 2-0 kol ha ka sngi Ba-ar ha Subroto Park Football Ground kaba ha nongbah Delhi.
Kane ka nam jop ka la wan urlong lyngba ki kol ba la thep da u Ïaisanlang Dohling bad u Erickson Shylla na ka bynta ban khur ïa ki lai point ha ka Pool-H.
Ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang ha kaba ki la ïoh ïa ki katto katne ki kabu kiba biang, hynrei kim shym la lah ban thep. Dei hashwa ban kut ka jingïalehkai jong ka kylla step ba katei ka kynhun ïalehkai ka nongbah ka la ïoh ban pynkhih jar nyngkong eh lyngba u Ïaisanlang ha ka minit kaba 42.
Hadien katto katne ba la bteng biang ïa ka jingïakhun jong ka kylla miet, kine ki kynhun ki la pyrshang biang ban ïakhun tyngeh, hynrei ka North Liberty ka la ïoh ban thep biang ïa ka kol kaba ar lyngba u Erickson ha ka minit kaba 64.
Watla ki rangïalehkai ka RKM Academy ki la pyrshang ban ïakhun tyngeh na ka bynta ban ïoh pynphai, hynrei kam shym la lah ban pynurlong bad ka la mad ïa ka jingshah rem.
Lyngba kane ka jingjop ka North Liberty kaba na West Jaiñtia Hills, ka donkam ban ïalehkai bha ha ki ar tylli kiba dangsah jong kane ka pool kata ïa ka kynhun kaba na Kerala ha ka sngi Balang ha ka por 10:30 mynstep bad ïa ka Delhi ha ka sngi Palei ha ka por 10:30 mynstep.
Ki kynhun ki ban wan ha ki kyrdan ba hakhlieh ha baroh phra tylli ki group kin ïoh rung sha ka quarter-final kaba la buh ban pynlong ha ka 22 tarik mynta u bnai.
Lah ban pynkynmaw, ka Meghalaya ka la wan ha ka kyrdan ba-ar ha u snem ba la lah, hadien ba ka Mynken Christian Higher Secondary School na Ri-Bhoi ka la shah rem ha ka kynhun kaba na Manipur.
