Shillong, Nailur 16
Ïa ka met ba dang sah jong i heprit Insaphira Lyngdoh Mawnai iba la khlad noh hynnin ka sngi Nyngkong, ka 15 Tarik u Nailur 2025, la leh burom khatduh ha ïingsah kaba don ha Nongrah Nonglum.
Ïa i heprit Insaphira la leit ontep ha u Lum jingtep ka Balang u Blei Nongrah ha ka jingïadonlang ki bahaïing hasem bad ruh da ki hajar ngut ki paidbah kiba na ka shnong bad kiba na jngai ruh kumjuh, kiba la wan sngewlem halor kane ka jingkhlad noh jong i.
I heprit Insaphira idei i khun jong i Kong Labyntalin Lyngdoh Mawnai bad u Bah Gowell Lyngdoh Mawphlang.
Hashwa ban leit ontep ïa ka met jong i heprit, la pynlong shwa ïa ka jingïalang ba khatduh ha ïingsah jong i heprit Insaphira kaba la pynïaid da u Bah Denis Lynrah u Rangbah Shnong ka Nongrah. Hadien kata la ïaid pat sa ka jinglehniam ba khatduh.
Ha kane ka sngi la ïoh ka jingrwai lang bad ka jingduwai lang da ki paidbah baroh kiba la ïa wan sngewlem ba u Blei un pyntngen, ban aibor ïa ka Kmie u Kpa bad ïa ki bahaïing hasem jong i heprit Insaphira.
La sakhi ba ha kane ka sngi ki paidbah kiba la wan sngewlem ïa i heprit Insaphira ki la jaw ruh ki ummat namar ba kum kane ka jingjia kaba pyntieng bad pynsyier ïa ka imlang ka sahlang hi baroh kawei.
Haba kren ha kane ka sngi, na ka liang u Kpa jong i heprit Insaphira u Bah Gowell Lyngdoh Mawphlang u la kyrpad ïa ki bor pulit ban kem ïa ki briew kiba donkti ban pynïap ïa ka khun jong u, khnang ban ïoh ïa ka jingbishar hok.
U Bah Gowell u la kyrpad ruh ïa ki paidbah ba kin ym pynsaphriang shuh ïa ki dur ne ki video jong i heprit Insaphira namar ba kum u Kpa u don ka jingktah ha ka mynsiem bad ka ïing hi baroh kawei.
Na ka liang u Secretary ka Shnong Nongrah u Bah P.Pyngrope u la kyrpad ïa ki briew ba leh ïa kane ka kam ba kin sngewbha ban aiti noh ïalade ha ki bor jong ka aiñ.
Shuh-shuh u la ong ba kane ka jingjia ïa i heprit Insaphira kadei ka jingjia kaba sngewsih haduh katta-katta, kaba la pynsyier haduh katta-katta ïa kiba bun ba lang.
U Bah Bantylli Nari pat uba dei u President ka Synjuk ki Nongsynshar Shnong Nongthymmai Pyllun u la ong ba kum kane ka jingjia kadei kaba hap ban pynrem jur ïa ki briew kiba donkti ban leh ïa kane ka kam bad ka bym lah ban pdiang ha ka imlang ka sahlang.
“Ine i heprit Insaphira idei iba dangsan dangheh bad iba dang khynnah bha hynrei ha kum kane ka jingjia ka long kaei kaei kaba pynpait dohnud. Ym don kyntien ksiar kyntien rupa ban sop ban spaiñ ïa ki dohnud jong ki bahaïing khamtam eh ïa ka Kmie bad u Kpa, hynrei dei tang da ka bor uba najrong uba lah ban pyntngen ïa ka mynsiem jong phi” la ong u Bah Bantylli.
Shuh-shuh ula bynrap da kaba ong ba kane ka la dei ka por ban pyrta bad ban kyrsiew thiah ïa ki bor ba halor ba kin peit, ban wad bniah halor kine ki jingjia, bad ba dei ban pynshitom katkum ka aiñ, khnang ba ka shongsuk shnong shngaiñ kan don ha ki shnong ki thaw.
Lah ban kdew hangne ba i heprit Insaphira i la jah na la ïing ha ka step jong ka sngi u Blei bad ha ka jingwad jong ki paidbah ka shnong, la lap pat ïa ka metïap jong i ha kawei ka ïingbriew kaba dang shna thymmai kaba don marjan bad ka ïingsah.
