Kiba pyrshah ai jait kpa kim kwah ba ka tynrai u symbai un kharoi (Blood Relation-ship) ki kham kwah ïa u symbai ba bet ki kpa bym dei Khasi. Ki bun hangne hapoh ri Khasi kiba kwah ai jait kpa, hooid ki bun ruh kiba kwah pynneh ïa ka ai jait kmie. Hynrei ngi dei ban peit bad bishar katkum ka jingkylla jong ka por, ym ban shu kwah neh sah hajuh khlem da wad ïa ka jingshisha.
Ngi donkam ban don ka jingkylla khamtam kano kano ka rukom bat dustur riti ka pyntroiñ ïa ka jaitbynriew. Dei ban da wad ïa ka daw tynrai ym ba ngin shu bud kum ka Masi sam khmut kat shaba ïalam. Ngim beiñ ïa kiba kwah ai jait kpa bad kwah ïaroh ïa kiba kwah ai jait pynneh ïa ka ai jait kmie ruh. Ngi dei ban tur shakhmat ban pynpaw ïa ki jingshisha kiba ngi ïoh myntoi na kaba ai jait kmie bad kumjuh na kiba kwah ai jait kpa.
Namar ha satlak ka pyrthei ki ai jait kpa, hato ki ïoh jingmyntoi na kane kaba ai jait sha ka kmie? Ne ngi shu bud pateng la pateng ba ïa buh uta u longshuwa manshuwa ngi hun beit kumta. Nga te nga kwah ïa ka mon laitluid ïa nga kwah longbriew ne kwah long ksuid. Ngam kwah ban sah hajuh khlem jingkylla ha kane ka rukom kheiñ jait ai jait ruh. Ngi kwah jingkylla na ka bynta ka jingbha lang jong baroh kum ka jaitbynriew Hynñiewtrep Hynñiew skum
C. B. Iawphniaw
