Shillong, Nailur 16
Kum shi bynta jong ka jingrakhe ïa ka Seva Pakhwada kaba dang ïaid shakhmat, ka Shillong Airport ne ka Kad Liengsuiñ, Shillong kan rakhe ïa ka ‘Yatri Sewa Diwas’ ha ka 17 tarik Nailur 2025, (sngi Thohdieng), kaba thmu ban kyntiew ïa ka jingshem jong ki nongleit nongwan bad ban kyntiew ïa ka jingïatreilang bad ki paidbah ha Kad Liengsuiñ.
“Ban rakhe ïa kane ka sngi, la thmu ban pynlong ïa ki jinglehkai kiba ïadei bad ki nongleit nongwan bad ki jinglehñiam kiba ïadei bad ka kolshor ha katei ka sngi”.
Ki nongleit nongwan kiba poi ha Kad Liengsuiñ yn pdiang sngewbha da ki syntiew bad ka jingleh sngewbha tynrai kaban pyni ïa ka jinglong tynrai kaba riewspah jong ka Jylla Meghalaya.
Nalor ki jinglehkai da kaba pyni ïa ka kolshor, ka Kad Liengsuiñ kan pynlong ïa ki katto katne ki jingïalang kiba ïadei bad ka jingbha jingmiat, kynthup : Ki jingïakop kylli jingkylli bad dro dur hapoh ka jaka pynïeng kali, kum shibynta ban pynshlur ïa ka jingïashim bynta na baroh ki nongleit nongwan bad ki khynnah trai shnong.
Yn buh ruh ka jaka peit bniah ïa ka koit ka khiah khlem jingsiew na ka bynta ki nongleit jingleit bad ki nongtrei ha Kad Liengsuiñ.
Nangta ka jingai snam kaba la pynlong ryngkat bad ki bor pynïaid ka koit ka khiah ha ka thaiñ bad ki seng treimon sngewbha.
Ki jingrakhe ki pynpaw ïa ka jingangnud jong ka Shillong Airport ban pynlong ïa ka jingïakynduh kaba sngewtynnad, kaba shngaiñ, bad kaba pynïasoh ïa ki nongleit nongwan, ban ïarap ruh ïa ka jingbha jingmiat ha ka imlang sahlang bad ka jingïadei ha ka imlang sahlang kumjuh.
La khot sngewbha ïa baroh ki nongleit nongwan bad ki nongïashim bynta ha katei ka sngi, kum shi bynta ban rakhe ïa ka ‘Yatri Sewa Diwas’ bad ban pynlong ïa ka kum ka jinglehkmen ka ban sah jingkynmaw.
