Nongpoh, Nailur 17
Kumba san spah duna eiei ki briew kiba don jingduna ha ki dkhot met ba kynthup lang ruh ïa ki ‘riew tymmen kiba la kham noh ka rta, ha ka sngi Balang ki la ïoh ïa ki lad jingïarap ei khlem da siewdor, kum ka wheelchair, ki kali lai shaka, ki tiar ïarap ban ïohsngew, ki diengduh bad kiwei-kiwei ha ka prokram Samajik Ahikarita Shivir kaba la pynlong ha Umling C&RD Block, Ri-Bhoi District.
Kane ka prokram ka dei kaba la pynlong da ka Artificial Limbs Manufacturing Corporation of India (ALIMCO) ryngkat bad ka ophis jong u Deputy Commissioner (DC) ka Ri-Bhoi District hapoh ka jingkhmih jong ka tnat Empowerment of Persons with Disabilities (Divyangjan), Ministry of Social Justice and Empowerment ka Sorkar India.
Nalor ka Umling C&RD Block ha Ri Bhoi District, kaba kum kane ka prokram, la pynlong ruh ha ki hynniewphewsaw (74) tylli kiwei pat ki jaka ha kylleng jong ka ri India lyngba ka prokram Samajik Ahikarita Shivir ha kaba la sam ei ïa kitei ki tiar lyngba ka skhim ADIP bad RVY bad tang ha Ri-Bhoi District, ki don haduh kumba ar hajar (2000) ngut kiba la ithuh bad kiba la ïoh jingïarap ki don kumba san spah (500) duna eiei.
Ha kane ka jingïalang, la wan ban ïadon ryngkat da u Bah Sosthenes Sohtun, MLA/MDC ka Jirang Konstitwensi, uba dang shu dep bam smai kum u Myntri ba thymmai ka Sorkar, ka Kong Rona Khymdeit, MDC ka Nongpoh, u Abhilash Baranwal, DC ka Ri-Bhoi, u Anupam Prakash Deputy General Manager ka ALIMCO, u Prakash Singh Manager ka ALIMCO nalor kiwei-kiwei ki heh ophisar.
Haba ai jingkren ha kane ka sngi kum u kongsan, u Bah Sosthenes Sohtun u la pynpaw ïa ka jingkmen kaba khraw ban ïohi ïa ki briew kiba don jingduna ha ki dkhot met bad ruh ki ‘riew tymmen ki la ïoh ïa ki tiar jingïarap ei lyngba kane ka prokram kaba long da shisha ka jingkyrkhu kaba khraw ïa ki, khamtam kito kiba duk bad duna ha ka jingïoh, ki bym lah ban thied ïa kitei ki tiar.
