Shillong, Nailur 17
U Bah Sanbor Shullai uba dang shu shah pynrung kum u Myntri ba thymmai ka Sorkar bad ruh uba dei u Nongïalam ka BJP u la kyrpad ïa ki paidbah ka Jylla ba kin ailad lem ïa ka BJP ba kan thaw ïa ka Sorkar ban pynthikna ïa ka jingpyntreikam mardor ïa ka Inner Line Permit (ILP) hapoh Meghalaya.
Haba kren sha ki lad pathai khubor ha ka sngi Balang, u Bah Sanbor u la ong, “Ka ILP ka dei ka mat ka Sorkar Pdeng. Ngi ju ïakren bad ïatai man ka por halor kane. Man ba nga leit sha Delhi, nga ju pynkynmaw ïa ki Myntri bad ki Nongïalam ha Delhi hynrei kam shong ha ka kti jong ngi. Kumta, kyrmen ba shisien ka sngi kine kiei-kiei kin sa urlong khamtam nga kyrpad ïa ki paidbah ka Meghalaya balei ba kim ailad lem ïa ka BJP bad ai ïa ngi 31 ngut ki MLA. Na ka por sha ka por, ngi ju kyrpad ïa kane ba balei ki nongshong shnong ka Meghalaya kim ai ka bor ha ka BJP. Ai ha ngi ïa 31 ngut ki MLA bad ailad ba ngin thaw ïa ka Sorkar san snem bad hangta phin sa ïohi ïa kiei kiei baroh.”
U Bah Sanbor u la phla ruh ba ka BJP kala ïaid ïalap bad ïakynduh bad ki kyrtong kiba don jingkyrmen ban jop ha kylleng ki jaka jong ka Jylla. Da ka jingpyrshang jong ka seng ban jop bun seat, u la buh ïa ka thong ban jop 8-10 seat ha ka ilekshon ban wan.
“Ngi la dep sdang mynta la arsnem shiteng ban ïaid ïalap bad ïakynduh ïa ki kyrtong kiba don jingkyrmen ban jop ha Meghalaya bad halor ka jingbthah jong ki nongïalam ka seng ruh, ngi la ïaid sha man ki jaka jong ka Jylla ïa kaba ngi la kohnguh bad ki jingbthah ki nongïalam bad ruh jong u President bad ngi la ïaid kylleng bad nangpynjur ïa ki jingïalap jong ngi. Ngi don mynta sa arsnem shiteng bad ngi kyrmen ba, ngim lah ban ong ba ngin jop baroh 60 seat hynrei ngin jop 8-10 seat ha ka ilekshon ban wan,” la ong u Bah Sanbor.
Haba kylli, u Bah Sanbor u la ong, ka BJP ka dang ïakren ruh bad ki katto katne ki MLA jong kiwei pat ki seng bad kyrmen ban lah ban khring noh ïa kiba bun sha ka BJP.
“Ngi dang ïakren bad ki bad kyrmen skhem ba bun na ki MLA ba mynta kin sa wan ïasoh sha ka BJP bad ban ïakhun ïa ka ilekshon na ka BJP,” u la ong.
Shuh shuh, u la kam ruh ba ki paidbah ka Meghalaya kila sdang ban pdiang ïa u Myntri Rangbahduh ka Ri u Narendra Modi haba pynshong nongrim ïa ki kam lyngba ki skhim pynroi bad ki prokram bapher-bapher bala pyntrei da ka Sorkar Pdeng. U la sot nuksa kum ïa ka jingai marbam rashon ei, dawai ei bad jingkyrshan pisa sha ki nongrep, kaba la ïarap bha ïa ki paidbah.
U la kren ruh halor ki jingkynnoh ba ka BJP ka dei kaba shun ïa ki Khristan bad ba khang bam doh masi da kaba ong ba kine ki jingkam ki dei ki bym lah ban pdiang bad ki dei tang ki buit ilekshon jong ki Liang Pyrshah.
“Nga kynmaw ïa u Bah TH Rangad haba u ïakhun na ka BJP, kajuk ka rukom kynnoh jong ki liang pyrshah bad u Bah Rangad bad ka BJP kin sa wan ban khang tala ïa ki ïingmane bad khang bam doh masi hynrei mynta nga buh ka jingkylli ïa ki nongshong shnong ka Meghalaya bad South Shillong, hato kine ki jingkynnoh ki wan jia, Em. Ha ka por ba nga rung BJP hadien ba nga la ieh ïa ka NCP, ki la kynnoh ïa kajuh pyrshah ïa nga hynrei ong ïa nga hato kine baroh ki jingkynnoh ki la wan jia hapoh ka konstitwensi jong nga. Baroh ki paidbah ki kmen haba nga la rung sha ka BJP. Lada dei ba kito ki jingkynnoh ki long kiba shisha, ki paidbah ka konstitwensi jong nga, ki long shisha kiba stad bad shemphang ban jied ïa nga na ka BJP khnang ba ngan lah ban rah pat ïa ka jingeh ka jong ki beit-beit sha u Narendra Modi,” la ong u Bah Sanbor.
