Ha kine ki sngi, ngi la ïohi ba ki kam tuh kam thiem ki la kynrei bha bad ba ka la don ruh ka jingshah tuh jong ki tiar ki tar bad ruh ki arshaka na kylleng ki jaka. La ïoh jingtip ba kiba tuh ïa ki arshaka bad ïa kiwei ki tiar ki ïaleh pat ban die ha ka dor kaba tad. Nalorkata, ka jingdie ïa ki ar shaka ka long hadien ba la leh thok leh shukor ïa ki kot ki sla. Kane ka long shisha kaba ma haduh katta katta namar ha ka jinglalot ban ïoh da ka ar shaka ba shong tad, ïoh kum thied pynban da ka mar kaba shu tuh. Ka jingdie ïa kine ki mar tuh ka long ruh lyngba ki rynsan OLX, Facebook.
Ki nongshong shnong ki dei ban ïa husiar hashwa ba kin thied ïa ki ar shaka ‘second-hand’ namar ym lah ban shaniah kulmar. Hashwa ban thied, dei ban wad jingtip shwa na ki thanat pulit. Ha ki thanat, kin don beit ki jingthoh jingtar kiba ïadei bad ki ar shaka lane ki kali kiba la shah tuh. Lada dei kiba nabar jylla ruh, ki pulit na ka jylla jong ngi ki lah ban pynïarap ban pynthikna. Ynnai ïa kwah ïa kaba tad ïoh poi sha ka sohsat. Ban shaniah kulmar ruh kam dei. Ki lah ban wan ki paralok ne ki bahaïing hasem ban tyrwa tad ïa ki ar shaka. Pyndonkam ïa ka jabieng. Yn ym don ban die tad ïa kano-kano ka mar kaba dang shu pyndonkam tang katto katne. Lada phi shem ba ka dor ka long kaba rit palat haba ïanujor bad ka jinglong jong ka mar, ka mut ka don eiei sha lyndet jong kata, bad phin hap husiar.
Nalorkata, ha ka jingkynrei jong ka “Cyber Crime” lane ki kam shukor lyngba ki rynsan ba pyndonkam da ka Internet kum ka OLX, hap ban ïa kham pynjur ïa ka jinghusiar. Ki bun bah ki nongshong shnong kiba la shah thok lyngba ka rynsan OLX ha ka jingthied ïa ki mar ki mata ‘second-hand’. Ki bun kiba la siew pisa, hynrei ki khlem ïoh ïa ka mar. Don kiba la siew pisa na ka bynta ki mar ba shu tuh na kiwei. Ki don kiba leh mynleh kum ki shipai ïada ri kiba donkam ban die tad ïa ki mar ki mata namar ka jingshah pynkynriah kam noh shawei. Ki nongthok nongshukor ki ïaid ar kam ban ïa ki pulit namar ki dei ki briew kiba shalak bad kiba nang ban pyndonkam ïa ki kor ki bor ban thok. Kat ban da lap ïa kito ki nongshukor, la mih sa da kiwei pat ki buit treikam jong ki kiba kham triem shuh shuh.
Kiba kham bun na ki nongshong shnong ki kamai da ka hok, ki da pynjaw ïa ka syep ka syar ban ïoh ïa ka jakpoh, ban pyndap ha ïing ha sem, ban thied ïa ki jingdonkam bapher-bapher. Hynrei ki don pat kiba shu kwah ban kamai da kaba shong lane kiba kwah ban ïoh spah da kaba suk. Ki shukor da ki laiphew jait laiphew rukom bad kiba ym pat da kot bor ha ka jingmut jingpyrkhat, ki kloi ban ngop. Tangba ha ka jinglong briew, mano bym ngop lada don kiba tyrwa ïa ki mar ba remdor ha ka dor kaba tad? Ha ka jinglong briew, ngi kwah beit da kaba kham duna dor bad namarkata, ngi kum ngop noh ha ki riewsniew kiba im da kaba thok bad shukor ha ki rukom bapher bapher. Lada phi la sngewthuh ba ki la ngat ha ka shrip jong ka jingshah shukor, phi dei ban pyntip mar-mar sha ki pulit khnang ba kin pyrshang ban pynsangeh ïa kato ka pisa ba phi la siew. Lada sted ban pyntip, ki pulit ruh kin lah ban ai jingïarap kham kloi. Kat nang slem, katta nang jynjar ban ïohkem ne ban ïoh pynsangeh ïa ka pisa jong phi.
