Shillong, Nailur 17
Hapdeng ka jingïakynad halor ka ‘drama ïa khublei kti’ kaba la jia ha ka miet Sngi U Blei ha Dubai International Stadium, ka long kaba eh bha ba ka Pakistan Cricket Board (PCB) kan weng noh ïalade na ka Asia Cup kaba dang ïaid shakhmat.
“Ka long kaba eh bha ba ka PCB kan weng noh ïalade na ka Asia Cup,” la ong ki tyllong khubor na ka PCB.
“Lada ngi leh kumta, ka ICC hapoh ka jingïalam u Jay Shah kan buh ïa ki jingpynshitom kiba kham eh ïa ka PCB, bad kane kan buh jingeh ha kaba ka board jong ngi kam lah ban siew. Ka jinglong jingman ha ka liang ka pisa tyngka hadien ka Champions Trophy, ha kaba la pynthymmai ïa baroh ki madan ïalehkai, kam long kaba bha,” la bynrap shuh shuh ki khubor.
Kane ka la jia shisngi hadien ba u President ka PCB bad uba dei ruh u khlieh jong ka Asian Cricket Council ba mynta u Mohsin Naqvi u la thoh ha ki rynsan social media da kaba ong “Ym don kaei kaei kaba kham kongsan ïa nga ban ïa ka burom jong ka ri jong nga.”
Na ka liang ka PCB ka la ujor ruh pyrshah ïa u match referee u Andrew Pycroft sha ka ICC, uba la bthah ïa u kapten ka Pakistan u Salman Ali Agha bad ïa u kapten ka India u Suryakumar Yadav ba kin lyndet noh ïa ka rukom ïakhublei kti ha ka jingïakynting pisa shwa ban sdang ka jingïalehkai.
“Ka long kaba sngew shyrkhei ban ïohi ba uwei u nongpynïaid ba la thung da ka ICC un shim ïa ka sien jam ban ïaleh pyrshah ïa ki kyndon jong ka mynsiem ïalehkai kriket bad ki aiñ jong ka MCC,” kat kum ka shithi jong ka PCB.
“U rephri ba long u nongpynïaid ïa ka jingïalehkai um shym la lah ban pyndep ïa ka kamram jong u: ban pynthikna ba ka jingburom ka long kaba la pynïar bad pynneh hapdeng ki kapten bad kumjuh ruh hapdeng ki arliang mamla kiba ïakhun; bad ban thaw ïa ka jinglong kaba bha da ka jinglong jong u bad ban pynshlur ïa ki kapten bad ki kynhun kiba ïashim bynta ban leh kumjuh.”
“Ha ka jingshisha, ki jingbthah jong u nongpynïaid ïa ki arngut ki kapten jong ka kynhun ki long kiba la pynbeit lut ban ïoh ïa ka jingmih kaba pyrshah. Kane ka jingleh bymsuidñiew ka pynkheiñ ïa ka Article 2 jong ka ICC Code of Conduct na ka bynta ki nongpynïaid ïalehkai, kaba pynlong kyrpang ïa ka kum ka jingleh beaiñ u nongpynïaid kaba long pyrshah ïa ki kyndon aiñ jong ka MCC.
Ka India bad ka Pakistan ki la dei ban kilanmet ha ICC Academy ha ka sngi Thohdieng. Katba la pynïapher ïa ka por. Ka jingkilanmet jong ka India kan long naduh ka por 6 baje janmiet haduh 9 baje mynmiet, katba ka Pakistan kan kilan met naduh ka por 8 baje haduh ka por 11 baje mynmiet.
Kumba ka long mynta ka India ka la ïoh rung sha ka Super 4 hadien ba ka UAE ka la jop ïa ka Oman ha ka lah sngi U Blei. Katba ka Pakistan kan ïakhun pyrshah ïa ka UAE ha ka sngi Balang bad ka donkam ban khur ïa ka jingjop. Lada ki lah ban pynliem ïa ka UAE, ka Pakistan kan sa ïakhun biang bad ka India ha ka sngi U Blei.
