Jowai, Nailur 17
U Myntri ka Sorkar Jylla bad MLA ka Jowai u Bah Wailadmiki Shylla ha ka sngi Balang u la lum jingïalang ban buddien ïa ka Ïawmusiang Market Complex kaba ka jingpyntrei mynta kala ïaid shaid-shaid.
Ha kane ka sngi, la synran ïa u Myntri da u Executive Member (EM) ka tnat Market ka JHADC Ma Seiborlang Shadap, ki ophisar na ka tnat PWD, ki nongïalam bad dkhot ka Jaiñtia Tribal Traders Association (JTTA) nalor ki katto katne ki nongshong ïew.
Ha ka jingïalang lyngkot, u Bah Wailadmiki Shylla u la pynpaw ïa ka jingsngew kmen ban ïohi ba ka jingtrei ban pyndep ïa ka ïawmusiang kala kynjoh sha ka 70 per cent bad u la ong hadien ba la dep ïa ka jingpyntrei kan long ka jingmyntoi kaba khraw ïa ki nongshong ïew.
“Kane ka ïew kam dei tang ka jingthrang jingangnud jong ki nong Jowai bad rilum Jaiñtia, hynrei ka dei ka thong kaba hakhmat eh jong nga naduh por ba ïakhun ïa ka ilekshon MLA-2018 ban pyndep ïa kino kino ki kam sahteng hapoh ka Konstitwensi,” la ong u Myntri. Ka ïawmusiang Market Complex ka dei ka jingtei kaba la sahteng la bun-bun snem bad ka Sorkar MDA kala shim ïa ka rai ban sdang biang ïa ka jingtei ïa ka ha ka jinglut kaba T.25.6 klur.
U la ong ba ka jingpynwan dur ne Plan ïa ka ïew la leh naduh u snem 2007-2008 bad ha u 2024 ka Sorkar MDA kala shim ïa ka rai ban sdang biang ïa ka jingtei ïa ka ïew ha ka jinglut kaba T.25.6 klur.
U la ai khublei ïa u kontraktor, Bah Pyrkhat Hinge uba la pyndep kloi ïa ka jingtei ïa kane ka ïew katkum ba la mang ban pyndep hapoh 2 snem.
U Assistant Executive Engineer ka PWD (Building), u Ma Wanker Slong u la pyntip baroh ki stall ne dukan ki long 320 tylli.
Na ka liang ka Jaiñtia Tribal Traders Association (JTTA) ka pynsngew ïa ka jingeh halor ka jingduna jong ki dukan katba ki nongshong ïew kiba don permit ki don haduh 600 tam eiei.
Kila pynsngew ruh halor ka jingdonkam ban pynshna ryngkat ki jingkhang ne shutter ha man la ki dukan ha kaba na ka liang u Bah Wailadmiki ruh u la kular ban shimkhia halor kane.
