Shillong, Nailur 17
U Myntri Rangbah ka Jylla u Conrad K Sangma ha ka sngi Balang u la bate kam sha ki phra ngut ki Myntri ba thymmai haba buh ïa katto katne kynthup ka tnat Cabinet Affairs, Finance halade.
Ki 8 ngut ki Myntri ki kynthup ïa saw na ka National People’s Party (NPP) u Bah Wailadmiki Shylla (Jowai), Timothy D Shira (Resubelpara), Brening A Sangma (Dalu) bad Bah Sosthenes Sohtun (Jirang), arngut na ka UDP Bah Metbah Lyngdoh (Mairang) bad Bah Lahkmen Rymbui (Amlarem), bad mar uwei na ka BJP Bah Sanbor Shullai (South Shillong) bad HSPDP Bah Methodius Dkhar (Mawshynrut).
Katkum ka jingpynbna, u Myntri Rangbah un dang ïai bteng ban bat hi ïa ka cabinet affairs, Finance bad kino kino ki tnat ki bym pat shym la ai sha kiwei ki Myntri.
Ki arngut ki Symbud Myntri Rangbah kata u Bah Prestone Tynsong bad Bah Sniawbhalang Dhar, kin dang bat hi ïa ki juh ki tnat treikam, kata u Bah Prestone un bteng ban bat ïa ka tnat Kam Pohïing (Police), Public Works Department (Roads & Building), District Council Affairs (DCA) bad Parliamentary Affairs katba u Bah Sniawbhalang un dang bat ïa ka tnat Urban Affairs, Transport, Commerce & Industries bad ka Prison and Correctional Services.
U Marcuise N Marak, uba dang neh kum u Myntri, u la ïoh ïa ka tnat Soil & Water Conservation kum ka tnad thymmai haba bteng ban bat ïa ka tnat Public Health Engineering (PHE) bad ka Housing.
Na ki 8 ngut ki Myntri thymmai, u Bah Metbah Lyngdoh u la ïoh ïa ka tnat Bording, Water Resources, Taxation bad Textile katba u Bah Lahkmen Rymbui u la ïoh khmih biang ïa ka tnat Education, Revenue Disaster, Information & Public Relation bad ka tnat Law.
U Timothy D Shira u la ïoh ïa ka tnat Tourism, Agriculture bad Fisheries, u Brening A Sangma u la ïoh ïa ka Border Area Development, Excise & Home (Civil Defence and Home Guard).
U Bah Sosthenes Sohtun u la ïoh ïa ka tnat Community & Rural Development (C&RD), Secretariat Administrative Department (SAD) bad ka General Administrative Department (GAD) katba u Bah Wailadmiki Shylla u la ïoh khmih ïa ka tnat Health & Family Welfare, Sports & Youth Affairs bad Home (Passport).
U Bah Sanbor Shullai u la ïoh ïa ka tnat Animal Husbandry & Veterinary, Arts & Culture, Printing & Stationery bad Legal Metrology.
U Bah Methodius Dkhar u la ïoh ïa ka tnat Food Civil Supply & Consumer Affairs, Labour Employment & Skill Department, Registration & Stamps bad ka Cooperation.
