Shillong, Nailur 17
U kpa jong i heprit Insaphira Lyngdoh Mawnai u bah Gowelstar Lyngdoh Mawphlang u suba jur ba dang don kiba donkti lang bad uto u khynnah ba dang 13 snem ka rta ban pynjah klep ïa ka khun jong u baroh shisngi bad baroh shi miet namar ha ka 15 tarik ki la leit wad ha kato ka ïing ba dang shna thymmai hynrei kim shym la lap.
Haba ïakren bad ki nongthoh khubor ha ïingsah jong u ha Nongrah Nonglum Brei, u Bah Gowelstar u la ong ba tang uto u khynnah marwei un nym lah ban rah ïa ka khun jong u hynrei ki dang don kiba donkti ban pynïap ïa ka khun kynthei jong u.
U la ong ban tang uto u khynnah um nym lah namar lada ur ne u hap la dei ban ïohi namar ki la leit peit man ka kynta haba ki ïaid ha katei ka lynti hynrei kum lashai ka sngi la lap da ka metïap.
Shuh-shuh u la ban biang ba ki donkti lang kiba la heh namar kam dei kaba suk ban rah ïa ka met briew sa ka jingjngai ka jaka.
U la pyntip ba une u khynnah u shait wan man ka por sha ïing jong u hynrei um poi pyrkhat ban jia kumne.
“Ban ong ba ka jingtohkit ka la kut ngim lah ban pdiang namar ka dei ka ‘mission fail’ hynrei ngi kwah ba ki pulit kin pynkut beit ïa kane ka jingjia haduh ban da lap ïa kiba dang donkti” u la ong.
Kumta u la kyntu ïa ki bor ba halor ba kim dei ban shim sting namar ki nonglehkam sniew kin dang ïoh bor.
Haba ïoh ban ïakren bad ka kmie jong u khynnah uba dang 13 ka rta uba katkum ka jingtohkit bad kaiphod jong ki pulit ba u la phla ba u la ïalam ïa i heprit Insaphira Lyngdoh Mawnai sha ka jaka ba dang shna iing thymmai, ha Nongrah Nonglum Brei, ka la ong ba kum ka kmie kam lah ban ngeit ba u khun jong ka un ïalam ïa i heprit sha katei ka jaka namar wat ha ka jingkynnoh ba shu thaw khana ba ïohi ïa ka kali scorpio rong ïong ym shym pat thikna la ka dei kaba u la ïathuh hok ne kaba u shu thaw.
Shuh shuh ka la ong ba ïa kata ka dak mong ha ki bynta jong ka kjat ka dei kaba la don dak lupa shuwa ban don katei ka jingjia.
Ka la ïathuh ba u khun jong ka, u shait leitkai man ka sngi ban ïalehkai bad ka Insaphira.
Ka la pyntip ba ki pulit ruh ki la rah ïa u khun ha ka 16 tarik mynta u bnai.
