M. M. Thaiang
Ka Elaka Labang-Nongphyllut, Nongphyllut Daloiship, ka dei kawei na ki Elaka ka Ri-Khatar Daloi kaba don ki ‘lawbah’ lawsan kiba heh bad kiba ïar bad hapoh kine ki khlaw lah ban shem ïa shibun jait ki mrad khlaw kiba wan riehtngen na kiwei ki Elaka jong ka Ri Khat-ar Doloi bad na Rilum -Rithor jong ka Jylla Assam.Ki Mrad khlaw kiba ngi lah ban shem hapoh kane ka Elaka, kum ki sier, ki skei (Skei Tyrkhang, Skei Sangam), ki ‘ñiangbri, ki ‘ñiangkhlaw, ki Hati, ki Mynthna, ki Masi Prut, ki Bthong, ki Shrieh walieh, ki Shrieh wasoo, ki Shrieh waiong, ki Hulu (Huleng) ki Dngiem larah, ki Dngiem thohrupai, ki Tngaw, ki Padersnieh, ki Pshat, ki Paidong, ki Iapwiang,ki Risang, ki Phyllat, ki Paidong, ki Miaw-Khloo, ki Khla sim, ki Ksar, ki Raiphlang,ki Raikyrtong, ki Khla walieh, ki Khla waiong, ki Rasang, ki Ksaw khyndaw, ki Suri, ki Myrsiang, ki Diengkhit, ki Brai, ki Tyrpit, ki Kyrbai bad kiwei de ki mrad khlaw.
Hapoh ka Elaka ki don ki ‘law kyntang (Khloo Blai) kiba heh kiba ïar kiba la tap da ki diengbah diengsan, kumjuh ha ki rud wah jong ka Wah Mynriang bad ka Wah Myni la tap da ki khlaw kiba rben bad ha kine ki khlaw lah ban shem ïa ki sim kiba bunjait, kum ki Nirai, ki Syiarbri, ki Khruit, ki Niangkhiar, ki Kohkarang (Ryngkohknor) ki Ramakhnah, ki sim Shun, ki Moina, ki Rasoi kdait, ki Rasoi wamon, ki Jalisiaw, ki Sim Daibei, ki sim Stain, ki Raklaw lieh khlieh (white head birds), ki Lyngdkhur jyrngam, ki Longdkhur Sangia, ki Longdkhur tisoo, ki sim Stain, ki Laroit, ki Rablong, ki sim siej, ki sim Phlang, ki Priet, ki Pdiat, ki Lakynjar, ki sim Puhdieng, ki Padersnieh, ki sim Shyntat, ki Pukni, ki Khliengiong, ki Khliengkokklir, ki Khlieng shakar, ki sim Latngap, ki sim Um, ki Latngap ki sim Kerklak, ki sim Lalit, ki sim Wato, ki sim Lapanda, ki sim Saro, ki sim Iarwat, ki sim Lashait, ki Labit, ki sim Parkhyndaw,ki sim Mukuh, ki sim Jiarktieh, ki sim Doklarngiang, ki sim Bain, ki sim Latngut, ki sim Phlang, ki sim bud Rasoi, ki sim Makariang, ki sim Sali, ki Khliengmaha bad kiwei de ki jait sim. Ha ki jaka lumphlang pat lah ban shem ïa ki Klaw (Klew), ki Koh; ki Jiarktieh, ki Latyut bad kiwei de ki jait sim.
Halor ki sim ki doh, ki mrad ki mreng, lah ruh ban shem ha ki khlaw barben jong ka Elaka ïa ki jait bseiñ ba bun jait kum u “Seiñ Iong, Seiñ Walieh, Seiñ Jyrngam, Seiñ Um, Seiñ Ramblen, Seiñ Soordang, Seiñ Rali, ki Tyrpit, ki Kyrbai, ki ñiangsarang, seiñ Khlot, ki Ramashieh, ki Rabiah khlaw, ki Rabiah ïangiung, ki ñiangtyrngem, ki ñiangjaw, ki Thapbawa, ki Wiehsoo, ki Wiehlieh, ki Wiehnar, ki ñianglartham, ki Khroh (Jakoid babun jait), ki ñiangwyrnai, ki ñiangkiah, (Skiah) bad kiwei de k jait khñiang ba bun jait, nalor ki Nai Piahlang, ki Khan, ki Khnai Nileiñ, ki Kyndat, ki Khnai Tangtur, ki Khnai tuh bad kiwei de ki jait Khnai.
Katba nangïaid ka por, namar ba ym don ki Sanctuaries bad ki Parks bad ka jingbeh thong u khun bynriew ïa ki( ban bamdoh), kine ki mrad ki mreng ki sim ki doh ki wieh ki ktiar kiba kynrei hapoh kane ka thain Elaka ki la sdang duh jait,la katta ruh ka jingdon jong ki ‘lawkyntang kiba heh kiba ïar hapoh kane ka Elaka bad ka jingdon ki khlaw kiba rben ha ki rudwah jong ka wah Mynriang, ka wah Myn-I, ka wah Umpani, wah Mynkhri ka dang sngewshngain ïa kine ki Mrad, ki Sim ki Doh bad ki Wieh ki Ktiar ban riehtngen ha kine ki ‘lawbah ‘lawsan jong ka Elaka Labang-Nongphyllut, Nongphyllut Doloiship
