Imphal, Nailur:
Ki bor pahara ki la ïohkem ïa uwei u lehnoh bad arngut ki paralok jong u ha Imphal East distrik ha ka por ba la don ka jingleit thwet lehnoh.
Ha kane ka jingpyntreikam, la ïoh kurup ïa ki tiar ïaleh bad ki kuli ha lum Kongba Maru hadien ka jingkhmih bniah na kine kiba la shahkem.
Kine kiba la shahkem ki don ka jingïadei bad trei hapoh ka kynhun National Revolutionary Front of Manipur bad kine ki la donkti ruh ha ki kam dawa pisa.
Ha ka 15 tarik u Nailur, ha ka jingkhynra ha ki lum Kongba Maru bad ki jaka ba marjan jong ka kiba hap hapoh ka Sagolmang Police Station, ki bor pahara ki la ioh ban kurup saw tylli ki tiar ïaleh ba la lute bad kiwei kiwei ki tiar siat.
Ki tiar ba la ïoh ban kurup ki kynthup ïa kawei ka suloi 5.56mm INSAS bad u Magazine, kawei ka pistol 9mm bad u Magazine, ar tylli ki suloi .303 bad ki Magazines, kawei ka suloi 12-bore single Barrel, 11 tylli ki song kuli bad san tylli ki kuli bym pat pyndonkam.
Shisngi shwa kane, kata ha ka 14 tarik u Nailur, 2025, ki bor pahara ki la kem ïa uwei u nongbud ba snar jong ka kynhun ba la shah ñiew beaiñ jong ka National Revolutionary Front of Manipur (NRFM).
Une u dkhot u dei uba la tip kyrteng kum u Ningthoujam Yamba Singh ba la tip ruh da ka kyrteng kum u Sanayamba (44) na ka shnong Keirao Bitra Awang Leikai, Imphal East.
Ha ka jingbuddien kaba la pynbeit ryntih, la kem ruh ïa arngut ki paralok jong u kiba donkti ha ki kam dawa pisa.
Kitei ki arngut ki dei kiba la tip kyrteng kum u Nongmeikapam Naresh Meitei (38 snem) bad u Yumnam Tejkumar Singh ba la tip ruh da ka kyrteng kum u Bobo (48 snem) bad baroh arngut ki dei kiba shong ba sah ha Singjamei Wangma Kshetri Leikai, Imphal East District.
Haba la pynlong ïa ka jingkhmih bniah, la ïoh ban kurup na ki kawei ka pistol .32 bad u Magazine ba la pyndap lai song ki kuli. Saw tylli ki Mobile Phone kawei ka Aadhaar card
Ki heh sorkar ki la ong ba ka jingkem bad jinglap ka dei ka sienjam kaba kongsan bha ban tehlakam ïa ki kam kiba ïadei bad ka jingshim pisa bad ban lap ïa ki tiar beaiñ ha ka thaiñ ba la shah ktah ha ki lehnoh.
Ka jingtohkit ka dang ïaid shakhmat ban lap ïa ka tynrai jong ki tiar ba la lute bad ka kynhun kaba kham heh jong ki briew kiba la shah kem.
