Shillong, Nailur 17
U Nongïalam ka BJP bad uba dang shah pynrung kum u Myntri ba thymmai ka Sorkar, u Bah Sanbor Shullai ha ka sngi Balang u la kyntu ïa ki kynhun bapher bapher kynthup ruh ïa ki sengbhalang ba kin pyrkhat biang ïa ka nongrim ba ki ïeng halor ka projek lynti rel khnang ban pynlah ïa ki rel kit mar ba kin poi haduh Byrnihat.
Haba kren sha ki lad pathai khubor u Bah Sanbor u la ong, ka rilum Garo bad ki jylla jong ka thaiñ shatei lam-mihngi kum ka Mizoram, Manipur, Nagaland, Tripura bad Arunachal Pradesh ki la ïoh jingmyntoi shibun na ka jingwan jong ka rel.
“Kyrmen skhem ba hapoh ka jylla jong ngi ruh hapoh ka jingïalam jong u Conrad K Sangma, ngin sa ïakren bad pynshai ïa ki sengbhalang ba kin hap ban khmih ïa kaei kaba jia ha rilum Garo bad kiwei ki Jylla ka thaiñ shatei lam-mihngi kum ha Mizoram, Manipur, Nagaland, Tripura, Arunachal Pradesh. Hangne ruh ki sengbhalang bad ki kynhun bapher-bapher, ki dei ban pdiang ïa ka lynti rel ban pynthikna ba la kumno-kumno ruh tang ka rel kit mar ka dei ban wan poi haduh Byrnihat,” ong u Bah Sanbor.
