Shillong, Nailur 17
Ka West Jaiñtia Hills Dis-trict Sports Association (WJDSA) ka la pynpaw ka jingsngewkmen halor ka jingïoh ïa u Myntri ba dei khmih ïa ka tnat ïalehkai ba thymmai na la ka jong ka constituency, u Bah Wailadmiki Shylla, hadien ba la pynbna ha ka sngi Balang.
Haba ïakren bad U Nongsaiñ Hima, u General Secretary ka WJDSA u Bah Lammat O Laloo u la pynpaw ka jingsngewkmen halor kane ka jingshimti u Bah Wailadmiki kum u Myntri ka tnat ïalehkai jong ka Sorkar Jylla. “Ngi dap da ka jingsngewkmen kaba khraw namar kum ka district ngim pat ju ïoh ïa ki nongmihkhmat napoh ka thaiñ ki ban ïoh ban shimti ïa ka tnat ïalehkai.”
“U Bah Wailadmiki u long u nongmihkhmat uba kham sngewtynnad bha ha ki kam ïalehkai bad uba ju don ïa ka jingangnud ha ka ban kyntiew ïa ki kam ïalehkai hapoh ka thaiñ. Te kumta lyngba kane ka jingïoh ban shimti jong u kan ïarap ban kyntiew ïa ka Jylla hi baroh kawei bad khamtam eh haba ka Jylla kan pynkhreh ban pynlong ïa ka 39th National Games ha u snem 2027.”
Ha kaba ïadei ba ka jingkular u Symbud Myntri Rangbah ka Jylla u Bah Sniawbhalang Dhar ha u snem 2023 ban mang haduh T. 25 klur ban maramot pynbha ïa ka Kiang Nangbah Stadium ha ka por ba u la wan jurip ryngkat u Bah Wailadmiki lem bad ki dkhot nongkitkam ka WJDSA, u Bah Lammat O Laloo u la ong, “Ngi kyrmen ba katei ka jingkular jong u kan urlong shisha hapoh ka thaiñ namar kum ki nongkitkam jong ka synjuk ngi don ïa ka jingangnud ban pynkylla dur noh ïa katei ka stadium naduh ka jingshna ïa ki ‘covered gallery’, ka madan ïalehkai bad kiwei ki jingdonkam.”
Shuh shuh u Bah Lam u la pynpaw ïa ka jingangnud ba ïa katei ka stadium yn lah ban pyndep noh shwa u snem 2028 khnang ba kan long ka jingmyntoi ïa ki nongïalehkai katei ka thaiñ bad ruh ba kin nangkiew ha ki kam ïalehkai.
