Washington, Nailur:
U President ka America, U Donald Trump, ha ka sngi Nyngkong, u la ong ba ka US, khatduh khatwai, ka la don ia ka jingiateh bad ka app jong ka China, kaba dei ka TikTok.
U Trump, haba iakren bad ki nongthoh khubor ha shwa ban leit sha UK, u la ong ba un sa ia kren bad u President ka China, u Xi Jinping.
“Ngi don ka jingiateh halor ka TikTok. Nga la poi sha ka jingiateh bad ka China. Ngan leit ban ia kren bad u President Xi ha ki khyndiat sngi ban wan ban pyntikna ia baroh,” u la ong.
La poi sha ka jingiateh hapdeng ka sorkar Trump bad ka China ban pynneh ia ka TikTok ban treikam ha America, la pynbna ki heh sorkar ha ka sngi Nyngkong, kaba pynkut ia ka jingpyrshang kaba la neh da ki snem kaba la sdang ha ka samoi treikam ba nyngkong jong u Trump, ong ka khubor jong ka CNN.
U symbud pla tyngka jong ka US, U Scott Bessent, u iathuh ba la lah ban iasoi ia ka framework agreement, bad U Trump, un sa ia kren bad u nongialam jong ka China, U Xi Jinping, ha ka sngi Palei, ban pynkut ia katei ka jingiateh. Ka jingïateh kular bad ka jingïakren ka long ka jingsdang jong ka jingïakynduh hapdeng u Trump bad u Xi kaba baroh arliang mamla ki la wad la bun bnai, la ong ki heh jong ka US ha ka sngi Nyngkong hadien ba la pynbna ïa ka framework plan.
“U President Trump u la don bynta ha kane, ngi la don ka jingïakren bad u hynnin ka miet, ngi la don ka jingpyniaid kaba kyrpang na u ngi la ïasam ïa ka bad ki paralok jong ngi na China,” ong u Bessent ha Madrid ha ka sngi Nyngkong. “Khlem ka jingïalam jong u bad ka jingpynbor kaba u ai, ngin ym lah ban kynthup ïa ka jingïateh kular mynta ka sngi,” kumba la kdew da ka CNN.
Ka TikTok ka la dum lyngkot ha ka ri America ha ka 18 tarik u Jymmang, ka sngi shwa ba ka aiñ pyndonkam da ki nongshun bar ri kan treikam. Hynrei ha ka 19 tarik Jymmang, shisngi shwa ba u Trump un shimti ïa ka shuki ha ka samoi treikam kaba ar jong u, u la ong ba un sa soi ïa ka ain treikam ha kaba sdang ka samoi treikam jong u ka ban pynthikna ba ki kompeni jong ka US kin ym shah pynshitom namar ba ki buh ïa ka TikTok ha ki app store ne ha ki server jong ki.
