Shillong, Nailur 17
Uwei u khynnah shynrang ba dang 13 snem ka rta u la shah ïalam hakhmat ka Juvenile Justice Board (JJB) halor ka jingkynnoh donkti haba ïadei bad ka jingïap ba sngewsih jong iwei i heprit iba dang 4 snem ka rta (dang shen) ha Nongrah-Nonglum Brei, Shillong.
Katkum ka jingïathuh u Superintendent of Police ka East Khasi Hills, u Bah Vivek Syiem, utei u khynnah, uba dei u para marjan bad uba ju wan ju leit mih barabor sha ka ïing jong itei i heprit, u la kubur ba u la leit ïalam ïa itei i heprit sha kawei ka jaka shna ïing kaba don hajan – na kaba la lap ïa ka met jong i ha ka 15 tarik u Nailur.
La ïathuh ba itei i heprit iba la tip kyrteng kum i Insaphira Lyngdoh Mawnai, i la jah rngai na la ïingsah ha ka por 8 baje mynstep jong ka 14 tarik Nailur.
Ka jingtohkit jong ki pulit kaba la lamkhmat da ka Special Investigation Team (SIT) hapoh ka jingkhlieh jong u SP (City), Bah Herbert Kharkongor, ka la lap ba utei u khynnah u la ïalam ïa itei i heprit sha katei ka ïing, ha kaba u la btuid bad tan lang ïa itei i heprit, kaba la ïalam pat sha ka jingjia ryngkat (aksiden) ha ka jingngam jyllop jong i.
Ka kaiphod jong ka ‘Post-Mortem’ ka la pyntikna ba ka daw jong ka jingïap ka dei namar ka jingngam jyllop, khlem kano-kano ka sabut ba la don ka dak jingmynsaw ne jingshah thombor.
Ha ka jingtohkit jong ka SIT, utei u khynnah u la phla ba u la ïalam itei i heprit sha katei ka jaka bad u la pyrshang ruh ban pynthut ïa ka jingmut-jingpyrkhat da kaba thaw khana shaphang kawei ka kali ‘Scorpio’ ba ïong bad ki shynrang kiba kah durkhmat.
“La phah ïa u sha Juvenile Home hynnin ka sngi na bynta ban peit bniah. Mynta ka sngi la leh ïa ka eksamin kaba bniah bad katto-katne ki jingpeit bniah ne ‘Medical Test’ ïa une u khynnah. Mynta la leit rah ïa u hakhmat ka Juvenile Justice Board,” la ong u Bah Syiem sha ki nongthoh khubor ha ka Sngi Balang.
“La ïoh pdiang ruh ïa ka kaiphod ‘Post Mortem’ mynta ka sngi bad ka la pynpaw ba ka daw jong ka jingïap ka dei namar ka jingngam jyllop. Ym don kano-kano ka jingmynsaw ha ka met, kam don kano-kano ka jingshah thombor bad ka jingïap ka long 24 haduh 36 kynta naduh ba la leh ïa ka ‘Post Mortem’, kumta kane ka kdew ba ka jingïap ka la jia ha katei ka jaka bad ym ha kiwei pat ki jaka,” u la ong.
Shuh shuh, u SP u la ong ba ka SIT kan sa nang tohkit shuh ïa ki jingkam jong utei u khynnah ban pyntikna la ka dei kaba shu jia ryngkhat (aksiden) ne da kumwei pat.
“Ka SIT ka ïoh por 90 sngi ban tohkit ïa kane ka mukotduma. Mynta hi kaei kaba ngi la pynshisha ka long ba dei u khynnah uba la ïalam ïa itei i heprit sha katei ka jaka. Ka la pynshisha ruh ba kam shym la don kano-kano ka jingshah lute naba ki soh skhor ksiar jong ka ki don kumba long. La pynshisha ruh ba kam shym la don kano-kano ka jingshah thombor bad la pynshisha ruh ba kam shym la don kano-kano ka jingmynsaw ha ka met. Ka kaiphod ‘Post Mortem’ ka la pynpaw ba ka dei ka jingjia ngam jyllop,” la ong u Bah Syiem da kaba bynrap, “Ngi donkam ban wad bniah shuh-shuh la une u khynnah u don ne em ka jingthmu. Ngi donkam ban wad bniah shuh-shuh la ka dei kaei-kaei kaba pher ne kaba shu jia ryngkhat (aksiden).”
