Shillong, Nailur 17
Ka jingïakhih kaba mih hapdeng ka seng ki nongñiah kali ha Jylla Assam bad Meghalaya ka la nang khluit hadien ba ka Motor Parivan Sewakarmi Sanmilita Mancha, Assam ka la pynbna ban pynsangeh noh pura ïa ka jingkiew kali sha Meghalaya naduh ka 18 tarik Nailur 2025.
Ka MPSSM kaba dei ka kynhun jong ki trai kali bad ki nongñiah kali ha Assam kiba kynthup ïa ki kali Tourist Dzire, Sumo, Innova, Traveller, ki Bus Night bad Day Super, ki Trok bad ki Tanker bad kiwei ka la pynpaw ïa ka jingpyrshah kaba jur ïa ka jingdawa jong ka All Khasi Meghalaya Tourist Taxi Association ban khanglad ïa ki kali ba la ‘register’ shabar ka Jylla, khamtam na Assam, ban rung sha ki jaka jngohkai ha Meghalaya.
Ki seng na Assam ki ong ba kane ka jingdawa kam don nongrim namar ki kali ‘tourist’ na Assam ki la don ïa ki three-state permit kiba kynthup ïa ka Jylla Assam, Megha-laya, Arunachal Pradesh bad katto-katne ruh ki don ïa ki All India tourist permit, kiba noh synñiang ruh da ka khajna kaba khraw sha ka Sorkar Meghalaya.
Watla ka jingtip la phah sha ka Sorkar Meghalaya naduh ka 9 bad 15 tarik Nailur da ka TTAA bad TOAA halor ka jingïakhih jong ka AKMTTA ha ka 16 tarik, hynrei ki nongñiah kali na Assam ki la ong ba mynta ki nongñiah kali Tourist na Meghalaya ki la sdang ban khanglad bad pynwit ha ki jaka jngohkai, kaba la ktah jur ïa ki nongwan jngohkai.
Ha ka kyrwoh, ka MPSSM ka la ong ba lada ka jingkhanglad ka dang bteng, ki kali Assam kin ym pynkiew shuh ïa ki nongwan jngohkai tang sha ISBT Shillong lane sha ki hotel kiba la buh kyrpang. Ka kynhun ka la pynbna ruh ïa ka jingïakhih da ka “Total Non-Cooperation” naduh ka 18 tarik Nailur kaba sdang naduh ka por 5 baje mynstep, kaba mut ba ym don shuh ki kali Tourist Assam kiba leit sha ki bynta ka Jylla Meghalaya.
Ka jingïakhih kum kane, ka MPSSM ka kyntait, ka lah ban ktah ruh ïa ki nongñiah kali Meghalaya kiba shim ïa ki nongwan jngohkai na Kad liengsuiñ Guwahati bad station rel. Kane kan wanrah jinghiar bad jingduh ïa ka jingwan ki nongjngohkai, bad kan ktah jur ïa ki paidbah kiba trei ha ka kam khaïi kum ki hotel, homestay, restaurant, dukan, nongdie madan, petrol pump, toll gate bad ki jaka set kali.
Ka kynhun ka la ong ruh ba la bun ki booking kiba la pynduh noh na ki nongwan jngohkai bad lada ka jingdawa jong ka AKMTTA ka dang bteng, ki nongwan jngohkai kin sdang ban pynkylla ïa ki jaka sah bad kin jied kiwei ki jaka kum ka Arunachal Pradesh, Nagaland, Uttarakhand, Himachal Pradesh, Bhutan bad Leh-Ladakh.
“Ka kam jngohkai kam dei jong kawei ka kynhun hynrei ka dei jong baroh kiba trei shitom naduh ki hotel, homestay, guide, tour operator, restaurant, trai dukan, bad nongdie madan naduh Byrnihat haduh Dawki, Jowai, Sohra, Shillong bad kiwei. Ym lah ban pynduh noh ïa ka roi ka par tang namar ki katto-katne kiba kwah shah pynleh kjeh,” la ong ka MPSSM ha ka kyrwoh.
