Jowai, Nailur 17
Ka Pasyih Cultural bad Pateinki Sabah-muswang ki la lah ban pynthikna ban jam sha ka quarter final ha ka lympung ïalehkai 3rd Division Football Tourna-ment na ka bynta ka 5th Adelbert Laloo Memorial Trophy ba la pynïaid da ka West Jaiñtia District Sports Association (WJDSA).
Ha ka jingïakhun pre quarter-final kaba la long ha Kiang Nangbah Stadium kaba ha Jowai ha ka sngi Balang, ka Pasyih Cultural ka la pynliem noh ïa ka Myrjai SC lyngba ka tie-breaker da 6-5 kol.
Ha katei ka jingïakhun baroh ar ki kynhun ki la ïakhaid mar 2-2 kol haduh kaba kut ka jingïalehkai. Ka Pasyih Cultural ka la thep ar kol ha ka kylla step lyngba u Army Rymbai ha ka minit kaba 19 bad u Seiborlang Dkhar (38), hynrei ka Myrjai ka la lah ban pynïakhaid kylla ha ka kylla miet lyngba u Jumonki Phawa (62) bad u Wanphai Chyrmang (80+2).
Ha ka jingïalehkai kaba bud, ka Pateinki Sabahmuswang ka la jop da 2-0 kol ïa ka West Madan Mustem. Kane ka la wan urlong lyngba ki kol ba la thep da u Pynbaitmi Phawa ha ka minit kaba 10 bad ïa kawei pat la ïarap pynthep da u rangïalehkai ka liang pyrshah u Beloved Talang (56) na ka bynta ban khur syndon ïa ka jingjop.
Haba phai sha ka jingïalehkai jong ka 2nd Division na ka bynta ka 8th Debo Shullai Memorial Trophy, ka Khlieh-mynkrem ka la pynliem noh ïa ka Risingsun Mukhla lyngba ka shi kol ba la thep da u Eurestos Mynthlu ha ka minit kaba 49.
Ha ka 20 tarik Nailur ka jingïalehkai quarter final jong ka 3rd Division kan long hapdeng ka SCSC Nonglatem bad Da-i-hi Mynsngat ha ka por 11 baje mynstep, katba ka Lumkhangdong Kyndongtuber ïa ka Youth Welfare Iooksi ha ka por 1 baje nohphai sngi.
