Shillong, Nailur 17
Ka Laitkyrhong ka la long ka kynhun kaba ar ban jam sha ka semi-final ha ka Second Division Football League 2025 ba la pynïaid da ka Shillong Sports Association, hadien ba ka la pynliem noh ïa ka Tynring da 3-0 kol ha ka sngi Balang ha SSA Stadium kaba ha First Ground, Polo.
Ha kane ka jingïakhun jong ka quarter final kaba ar, baroh ar ki kynhun ki la ïakhun tyngeh naduh kaba sdang, hynrei kim shym la lah ban thep kol haduh kaba kut jong ka kylla step. Ka Laitkyrhong ka la wanphai da ka jingkhlaiñ bor ha ka kylla miet ha kaba u Banshaibok Khongsngi u la thep ha ka minit kaba 50. Kane ka kynhun ka la pynbud biang sa ar kol lyngba u Learningstar warlarpih (62 & 78) na ka bynta ban khur syndon ïa ka jingjop.
Kumba ka paw ka Laitkyrhong ka la long ka kynhun kaba la bat ïa ka kyrdan ba hakhlieh ha ka Group-B, katba ka Tynring ka la rung sha ka quarter final hadien ba ka la wan ha ka kyrdan balai ha ka Group-C.
Ka jingïalehkai quarter final kaba lai kan long ha ka sngi Palei ha kaba ka Mawryngkneng kan ïakhun pyrshah ïa ka Marbisu ha ka por 4:15 nohphai sngi.
