Nongpoh, Nailur 17
San ngut ki runar kiba la suba donkti ban lute ïa uwei u heh saipan jong ka thaiñ 13 Mer Jorabat mynshem bnai, kata ha ka 24 tarik Nailar, 2025, ki la ngat noh ha ka ruh jong ki pulit ka jylla Assam hadien ka jingpynap shrip kaba la pynlong ha ki lai tylli ki jaka kiba kynthup ha Nongpoh, Byrnihat bad 12 Mer.
Katkum ka kyrwoh ba la pyllait paidbah da ki pulit ka Assam, la ïathuh ba napdeng kitei ki san ngut kiba la shah kem, lai ngut ki dei na Ri Bhoi District ïa kiba la tip kyrteng kum u Maxxpil K Marak bad u Tronit Sangma, kiba dei na Rajabagan, Byrnihat lem bad u Bijoy Thangkhiew na ka shnong Pahamsyiem. Ïa ki ar ngut na ka Jylla Assam pat la tip kyrteng kum u Hilbert Sangma na ka shnong Tandu jong ka thaiñ Sonapur bad uwei pat u dei uba la tip kyrteng kum u Nur Mohammad ba ju khot ruh kum u Ali na ka shnong Barpeta.
Ha ka jingtalasi ïa kitei ki san ngut, ki bor pulit kila ïoh ban kurup kawei ka suloi SBL, kawei ka wait, ar tylli ki tari, kawei ka mask, ka pisa T.2000/- ki jingdeng ksiar nalor ki mobile phone ba kynthup ïa ar tylli kiba shu tuh. Shuh shuh, ki pulit ki la kurup ïa ar tylli ki kali kiba kynthup ïa ka Redi-Go kaba don ïa u registration number ML10-B-7842 bad kawei ka Tata Tigor kaba don ïa u registration number ML10-B-6113.
Kum ban shu pynkynmaw khyndiat, ha ka step phyrngap jong ka 24 tarik u bnai Nailar, ka kynhun jong ki nonglute ki la leit ban rung ha ka ophis treikam bad ka ïingsah jong uwei u heh spah bad ïoh ban lute ïa ki jingdeng ksiar ryngkat ka pisa hashwa ba kin ïoh phet noh katei ka jaka.
