Shillong, Nailur 17
Ki trai jong ki jaka sah miet, ki nongshong dukan madan ha ki jaka jngoh-kai ha ki thaiñ Sohra, ki la pynpaw ba ka jingpynlong jingïakhih ka All Khasi Meghalaya Tourist Taxi Association (AKMTTA) ka la ktah shikatdei ïa ki.
Haba ïoh ban ïakren ïa ki katto katne ngut ki trai jong ki ïingbasa (home stay) ha ki thaiñ Sohra ki la pynpaw ba ka jingpynlong jingïakhih ka seng ki nongñiah kali kamai na ka Jylla ka la pynthut ïa ka jingwan tuid ki nongwan jngoh-kai ha katei ka thaiñ.
Haba ïakren bad u Bah Rapsing Liam u ba dei u trai ka Arwah Scenic View u la pynpaw ba ka jingdawa jong ki ka long kaba dei bad u ai ka jingïaroh ïa ka jingpynsngew jong ki sha ka Sorkar haba ïadei bad kane ka bynta, hynrei ki dei ban ïaid katkum ka lynti kaba dei, ban ïatreilang bad ki Assam Tourist Association kum-juh ka Sorkar Meghalaya bad ka Sorkar Assam da ka jingïa sngewthuh jingmut, ym ban shu khang kumba ki la leh mynta bad u la ong ba u khlem pyrshah ïa ki.
U Bah Liam u la pynpaw ba ka jingwan ki ‘tourist’ ka la hiar bha mynta bad ka la ktah ym tang ïa ka thaiñ Sohra hynrei ïa baroh kawei ka Jylla bad ka ktah ruh ïa ki trai ‘home stay’, ki nongtrei, kiba buh restaurant, ki jaka jngohkai bad ïa ki nongtrei ruh ki ba im ha ki jaka jngohkai.
U Bah Liam u la ong ba 70% ki briew ha ka thaiñ Sohra kiba im na ka kam jngohkai pyrthei bad da ka jingwan ki briew kiba nabar bad kan sa la long ka jingduhnong ïa ka thaiñ Sohra bad kiwei ki jaka ki ba don ha ka Jylla. Haba ïoh ban ïakren bad u President ka Tour Guide Association Meghalaya Sohra Unit u Bah Gillbert Khongsit u la ong ba ka jingkhang ka AKMTTA ïa ki kali ‘tourist’ kiba wan nabar ka la ktah ïa ka kam jngohkai ha ka thaiñ Sohra namar ki kali ‘tourist’ ki ban poi ha Sohra ki la duna bha.
U Bah Khongsit u la ong, u kyrshan ïa ka jingïakhih ki nongñiah kali ‘tourist’ ha ka Jylla hynrei u la ong ba ka jingthmu jong ki ka long beit ban bat ïa kiba wan sha Sohra. U la ong ba ha ka jingshisha ki dei ban bat naduh ki jaka ba kiba wan nabar ki rung sha Meghalaya, namar ka ktah ïa kito ki dribar kiba la poi shaduh Sohra.
U la kyntu ïa ka seng ki nongñiah kali kamai, ba kin leh da ka lynti kaba dei haba ïatyngkhuh kum kine ki jingjia namar ba ka Assam ka la byrngem ban khang ïa ki kali ‘tourist’ bad khamtam ïa ki kali kit marbam ban wan sha ka Jylla bad kane kan ktah ïa ka ïoh ka kot ka Jylla.
