Shillong, Nailur 17
Ki kam tuh kam thiem ki la nangjur bad bteng na kawei ka sngi sha kawei pat bad ïa kane la sakhi biang na ka jingshah tuh jong ki ar shaka bad kiwei ki kam tuh na kylleng ki jaka.
Katkum ka khubor ba la ïoh na ki pulit la ong ba u Rohit Kumar Rai u la ai ka jingujor ba ha ka step jong ka 15 tarik mynta u bnai, ka arshaka ka jong u, kaba don ïa u registration number ML05-AE-8510 la lap ba ka la jah na ka thaiñ Pynthorbah, Shillong.
Kumjuh ruh na ka liang jong u Bah Rolandwell Kharsyntiew u la ai ka jingujor ba ha ka 14 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-U-3179 na phyllaw jong ka jaka sah ka jong u, kaba don ha Mawblei, Shillong.
U Aditya Biswa ruh u la ai ka jingujor ba ha ka 15 tarik mynta u bnai, ha ka por kumba 10.30 mynmiet, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-Q-7310 na ka thaiñ Nongmensong, Shillong.
Ha kawei pat ka khubor u Bah Bankynsai Mukhim u la ai ka jingujor ba ha ka 3 tarik mynta u bnai, ha ka por 3 baje janmiet, ki runar bym lah ban ithuh ki la tuh ïa kawei ka ENB card kaba shongdor kumba T.77,303/- najan kawei ka tower kaba don ha Mawlai Mawroh, Shillong.
Na ka liang jong ka Kong Jngir Warjri ka la ai ka jingujor ba ha ka por shiteng synñia jong ka 13 tarik mynta u bnai, ki runar bym lah ban ithuh, ki la tuh ïa kawei ka muid na ka jaka sah jong ka kaba don ha shnong Manai Dong Sohkhlur ha Eastern West Khasi Hills.
