Shillong, Nailur 17
U MLA na Jowai Constituency u Bah Wailadmiki Shylla u la shimti kum u Myntri ba thymmai na ka bynta ka tnat ïalehkai jong ka Sorkar Jylla.
Ïa kane la pynbna ha ka sngi Balang hadien ba u la bam smai kum u dkhot ba thymmai hapoh ka kynhun myntri. U Bah Shylla u la shimti na u nongmihkhmat na Mawthadraishan u Bah Shakliar Warjri, uba la bat ïa kane ka kam naduh u snem 2023.
Watla u la bat ïa ka kam kum u Chairman jong ka MUDA, hynrei kane ka dei ka sien kaba nyngkong eh ba un long kum u Myntri na ka bynta ban bat ïa katei ka kam. Watla u la don ha ka rta kaba 30 snem, u Bah Wailadmiki u la shah pynkhamti ban bat ïa ka tnat ka koit ka khiah lem bad ka Home (Passport).
Kumba ka long mynta ka jylla Meghalaya kan khreh ban pynlong ïa ka 39th National Games ha u snem 2027. Te kumta donkam ban pyndep ïa baroh ki jingtei ha ka por kaba biang, ka jingai jinghikai ïa ki nongïalehkai bad ruh ban pdiang ïa ki hajar ngut ki nongïalehkai kan long kaba eh bha ha ka ban pynbiang ïa baroh ki jingdonkam.
