Shillong, Nailur 17
Ka bynta jong ka surok kaba don hajan jong ka Dawki Boating Point ka la twa kynsan ha ka por mynsngi jong ka sngi Balang, kaba la wanrah ruh ïa ka jingsyier mynsiem ïa ki nongleit nongwan.
Kane ka jingtwa khyndew ka la pynthut ïa ka leit ka wan jong ki kali ha shi lynter ka surok, kaba la pynlong ïa ki pulit Meghalaya ban ai jingbthah kyrkieh ïa ka leit ka wan.
Ki bor pynïaid ki la pynthikna ba la shah tang ïa ki kali rit ban ïaid lyngba katei ka jaka ba la shah ktah. La bthah ïa ki trok kiba heh bad kiba kit mar ba kin kiar na katei ka surok tad haduh ban da pynbna da kumwei pat ban ïada na ka jingjia aksiden bad ka jingkhapngiah shuh shuh.
La kyntu ïa ki nongleit nongwan bad ki nongjngohkai pyrthei kiba leit sha Dawki bad ki jaka ba marjan kiba thmu leit kai ba kin da pynbeit bha ïa ki jingleit jingwan jong ki, ban long kiba husiar, bad ban bud ïa ki jingbthah jong ki bor Sorkar. Ki kynhun pulit ki la don ha katei ka jaka ban buddien ïa ka jinglong jingman bad ban pynthikna ïa ka jingshngaiñ jong ki paidbah.
