Kane ka rukom ai Schedule Tribes Certificates naduh nyngkong ba la pynjari la ai Schedules Tribes ïa ngi ki Khasi – Pnar kata ïa u Khynriam, u Pnar, u Bhoi u War kiba long kum ki Tribes Khasi, la ai ïa baroh kiba dei ki Khasi Tribes la dei u shynrang ne kynthei ruh. Khlem ka jingpynïapher ïa kiba ai jait ha u kpa ne ka kmie ruh.
Tang ba dei u Khasi la kynthup lut hangne ha ka Schedule Tribes Certificates. Hynrei mynta ka long kaei kaei ka bym lah ban mutdur ba ki don kiba pyrshah ban ai Schedule tribes certificates ïa ki Khasi – pnar kiba ai jait ha u Kpa. Kane te ka long ka jingpynpait pynpra ïa ka jaitbynriew Khasi.
Haba ka jingthmu ka jingai Schedule Tribes Certificates ïa ngi ki Khasi ka long ïa baroh kiba don ka snam Khasi. Pynban mynta te ka la kylla lut imat ka rukom ai Schedules Tribes. Hana bym bit ban ai Schedules Tribes Certificates ïa ki Khasi ba ai jait kpa. Hangne te kumba ong ka ktien haba ïakynih ka ïar kynthei kata la wai ka pyrthei. Kane ka jingthoh jongnga ngam ïa shah liang ïano ïano ruh. Hynrei nga kyntu ba ka jingai Schedule Tribes Certificates ka dei ïa baroh ki Khasi – pnar la kiba ai jait kpa ne kiba ai jait kmie ruh kumjuh khlem pynïapher ha ka liang ka jingai Schedule Tribes Certificates ka dei ban ïaleh kumjuh kum ki khun Khasi Khara.
C. B. Iawphniaw
