Nongpoh, Nailur 18
Ki ar tylli ki seng ba kynthup ïa ka Federation of Khasi Jaintia & Garo People (FKJGP) lem bad ka Ri Bhoi Youth Federation (RBYF) na Byrnihat Circle ki la pynpaw ïa ka jingsngewkhia jur halor ka jingjia mynta ka sngi, ha kaba ki kynhun ñiah kali na Assam ki la khanglad ïa ki kali na Meghalaya ban leit sha Assam ha Jorabat.
Haba kren sha ki lad pathai khubor, u Bah Kitborlang Suting, President ka FKJGP Byrnihat Circle bad u Bah Franky Rani, Vice President ka RBYF Byrnihat Circle ki la ïathuh ba kane ka jingjia ka la buh jingeh shikatdei ïa ki paidbah nongleit-nongwan, khamtam kito kiba hap leit jingleit da ka liengsuiñ, ka rel, kiba leit shim dawai bad khamtam eh ïa ki khynnah pule kiba hap ban leit thoh ïa ki eksam bapher-bapher sha Assam.
Ki la pynpaw ruh ba kane ka jingïakhih kadei tang hapdeng ki kynhun ñiah kali, hynrei kumba la sakhi mynta ka sngi, ki paidbah ba bun ba lang baroh ki hap pynban ban mad jingeh bad kylla langkñia. Kumta na ka liang kitei ki nongïalam, kila dawa ba ka sorkar bad ki seng ñiah kali kamai, kidei ban pynbeit noh mardor hashwa ba kan poi shaduh u pud ban mih ki jingjia ba sngewsih.
