Shillong, Nailur 18
Ki pulit ka Jhalupara Outpost ha ryngkat ki pulit SOT ha ka 18 tarik Nailur 2025, ki la khanglad ïa ki dkhot ka All Khasi Meghalaya Tourist Taxi Association (AKMTTA) ban bat ïa ki kali tourist napoh ka Jylla Assam kiba ïaid lyngba ka surok Umshyrpi ban leit sha ki thaiñ Sohra bad kiwei-kiwei de ki jaka.
Kane ka jingbym shah ki bor pulit ïa ki nongñiah tourist ban bat ïa ki kali tourist ba wan na Assam, kadei hadien ba ki Association ka Jylla Assam ki la bat ïa ki kali kamai jong ka Meghalaya ha Jorabat bad Khanapara kum ka jingjubab ïa ka AKMTTA, kaba la sdang naduh 16 tarik Nailur 2025 ban khanglad ïa ki kali Assam ban leit sha ki jaka jngohkai pyrthei kiba don hapoh ka Jylla.
Ha kane ka sngi la wan poi ruh ki Magistrate ha Umshyrpi, ban pynthikna ba kan ym mih kano-kano ka huri-hura bad ban khanglad ruh ïa ki dkhot ka AKMTTA ban bat ïa ki kali na Assam.
Lah ban kdew ba naduh dang step jong ka 18 tarik u Nailur 2025, da ki spah tylli ki kali ba na Meghalaya kynthup ka kali u Myntri Sorkar barim ki la shah bat bad phah pynphai na Jorabat bad Khanapara Ri-Bhoi District da ka Association ka Jylla Assam.
La sakhi ruh ba ha kane ka sngi ka la mih ka jingïañia kaba jur bha hapdeng ki pulit bad ki nongñiah kali kamai tourist kiba dei ki dkhot ka AKMTTA, namar ba ki pulit ki la khang ïa ki ban bat ïa ki kali tourist ba wan na Assam.
Ka jingmih ka jingïañia kadei hadien ba ki nongñiah tourist na ka Jylla ki la thmu ban bat ïa ki kali tourist ba wan na Assam. “Lada mih ka jingïa umsnam phin bahkhlieh ma phi?”, buh jingkylli ki pulit ïa ki nongïalam ka AKMTTA.
Haba ïakren bad u President u Bah Ksandor Dkhar u la ong ba ka jingshah bat ki kali na Meghalaya ha Jorabat bad pynphai noh ïa ki, ka dei ka sorkar ban shim jingkitkhlieh, namar ka jingïakhih jong ki ban bat ïa ki kali tourist kadei namar ka sorkar kam shym la sngap ïa ka jingdawa jong ki ban thaw noh da ka polisi na ka bynta ki nongñiah kali tourist.
U la ong ba na ka liang jong ki, ki khlem khang ïa ki kali tourist ban wan sha Meghalaya hynrei ki khang ïa ki ba kin leit sha ki jaka jngohkai.
Shuh-shuh u la ong ba ki bat ïa ki kali tourist mynta ka sngi ym dei ba kim shah ban kamai ïa ki kali na Assam hynrei namar ba ki ‘passenger’ kin ïoh ban shong noh da ki kali tourist na Meghalaya ban leit sha ki jaka jngohkai.
“Mynta ki kali Sorkar na Jylla ki la shah bat ha Assam ki la sngewthuh ïa ka jingjynjar hynrei ïa ki nongñiah kali tourist pat ki la pan ban ai ïa ka polisi la baroh shi jingim, hynrei ka jynjar ba kin ai ïa ki ïa kata ka polisi” la ong u Bah Ksandor Dkhar.
