Mawkyrwat, Nailur 18
Ka Hynniewtrep National Youth Front ( HNYF), South West Khasi Hills District hapoh ka jingïalam u Bah Shiningstar Wanniang , President bad Bah Shimborlin Langte, Secretary ha ka 18 tarik u Nailur 2025 ki la leit ban ïakynduh ïa u Sub-Divisional School Education Officer jong ka South West Khasi Hills District ban buddien biang ïa ka kam kaba ka seng ka la dep ban ai jingthoh naduh ka 25 tarik u bnai Rymphang, 2025 ban pyntikna ba kan don ka jingshngaiñ jong ki khynnah skul hapoh ka distrik.
U Bah Shiningstar Wanniang, President HNYF-SWKHD lyngba ka kyrwoh khubor u la ong ba ka seng hadien ka jingïohi ba ka don ka jingbym shngaiñ shuh ïa ki khynnah, ki samla bad wat ïa kiba la heh la san na ka jingkiew sted jong ki jingsniew hapoh ka dong ka thaiñ bad na ka bynta ka jingshong shngaiñ jong ki khynnah ha ki jaka pule, ka seng sa shisien pat ka la wan ban buddien biang ïa kane ka kam ban pynkynmaw ïa ka tnat ba dei khmih ïa ka pule-puthi ba ka dei ban shimkhia noh mardor ïa ka jingdawa ka seng bad ban bthah ryntih ïa baroh ki skul halor kine ki mat.
Ba baroh ki skul ki dei ban buh da ki nongap pahara (Security Guard) hapoh ki jaka pule bad ban pynbiang noh ruh ïa ki CCTV ‘camera’ hapoh skul ne shabar bad ka jingrung jingmih jong ki khynnah hapoh skul kan long kaba tikna ryngkat ki bahaïing hasem.
