Shillong, Nailur 18
U kpa jong I heprit Insaphira Lyngdoh Mawnai u Bah Gowelstar Lyngdoh Mawphlang u la leit jngoh biang ïa ka jaka lap ïa ka metïap jong ka khun ha ka ïing ba dang shna thymmai kaba don kumba 100 meter ha shnong Nong-rah Nonglum Brei, Shillong mynta ka step jong ka 18 tarik Nailur 2025.
Kane ka jingleit jngoh u kpa jong I heprit ban peit biang ïa ka kynroh bad ïa ka jaka thiah pyllup ka khun kynthei jong u hadien ba u khynnah 13 snem ka rta uba ju wankai man ka por ha ïingsah u la phla ba dei ma u ba ïalam ïa kane ka heprit haduh katei ka ïing ba dang shna thymmai.
U Bah Gowelstar um pat ngeit haduh mynta ba ïa ka khun jong u la pynthiah ha katei ka ïing ba dang shu shna ha ka sngi ba ka la jah na ïing namar ki briew ki bun bha kiba ïaid ba ïeng namar ka don harud surok dewbilat.
U la ong ba ma u ruh u la leit ïaid najan katei ka ïing ha ka por ba u wan ban ujor ejahar sha ki pulit ka Rynjah Police Station hynrei um shym la ïohi eiei.
Haba kiba haïing kim pat hun ïa ka jingphla u khynnah ba dang 13 snem, u nongthoh khubor u la pyrshang ban leit buddien ïa kane ka jingjia bad ïakynduh bad u kpa I Insaphira u Bah Gowelstar.
Ha kane ka jingïakynduh u Bah Gowelstar u la pyni ïa ka phyllaw ba shait ïalehkai une u khynnah bad ka khun jong u, u la leit pyni ïa ka jaka ba u kñi jong ine I heprit u dang sait tiar haba ka khun jong u bad une u khynnah ki wan ha jaka ba u dang sait tiar.
U la batai, haba ka khun jong u ka la leit noh, une u khynnah u la bud nadien bad mar kumta khlem pat slem u kni u la leit buh noh ki tiar sha ïing hynrei haba u wad ïa ka insaphira um lap shuh.
U la pyni ruh ba barabor ka khyrdop ka khang tala hynrei ha kane ka step ba jah ka khun ka tala ka la plie bad la suba ba une u khynnah u la ïalam da kane ka khyrdop kaba don ha phyllaw.
Shuh-shuh u Bah Gowelstar u la pyni ïa ka kynroh ba une u khynnah u ju wan sha ïing da kaba kiew beit da ka kynroh kaba don syndah ka khyrdop ban rung sha phyllaw ïing.
U la ong ba une u khynnah u lah ban donkti lang bad kiwei de kiba la ap lypa hakhmat ïing.
U Bah Gowelstar u la ong ba kum ka ïing ka sem kan ïaid beit shakhmat ban kyrpad ïa ki bor ka aiñ ban lap ïa kiba donkti bad une u khynnah haduh ba ka khun jong u ka la khlad na kane ka pyrthei da kaba ban da u maw ha kawei ka ïing thymmai.
