Nongpoh, Nailur 18
Da ki spah ngut ki briew kiba dei na ki kynhun jong ki seng ñiah kali kamai bapher-bapher ka Assam ha ka step jong ka 18 tarik u Nailur, 2025, ki la mih paidbah ha Jorabat ban khanglad ïa baroh ki kali kiba don ïa u nombor jong ka Meghalaya ba kin rung sha ka Jylla Assam.
Kane ka jingjia ka la wanrah ïa ka jingdheng kali kaba shyrkhei ha ki bynta jong ka surok bah na 13 Mer ter-ter shaduh sha Jorabat ha kaba la sakhi ba baroh ki kali Meghalaya ba kynthup naduh ki kali kamai, ki kali shimet bad ruh ki kali Sorkar, ki la shah pynphai biang tang mar ïa poi ha khrum jingkieng Jorabat ha ki briew jong ki kynhun ñiah kali kamai ka Jylla Assam.
Ka jingkhanglad jong ki kynhun ñiah kali kamai ka Jylla Assam ïa ki kali Meghalaya ka dei kum ka jingpyn-i-bor bad ka jingbitar halor ka jingïakhih ba la sdang da ka seng All Khasi Meghalaya Tourist Taxis Association (AKMTTA) ha ka 16 tarik u Nailur, kiba la khanglad ïa ki kali kamai ka Jylla Assam ba kin leit sha ki jaka jngohkai pyrthei jong ka Meghalaya.
Haba ïoh ban ïakren bad katto-katne ki nongleit nongwan kiba la shah pynphai ha Jorabat ki bym kwah ban pynpaw kyrteng, ki la ong ba kane ka jingleh jong ki nongñiah kali kamai ka Assam ban khang pyrshah wat ïa ki kali shimet bad kali Sorkar ruh kumjuh, ka long kaba la palat, naba ha Meghalaya ym shym la khang satia ïa ki kali shimet bad ki kali Sorkar Assam, bad bynrap ba wat ïa ki kali kamai Assam ruh la shah ba kin wan haduh ka nongbah Shillong, hynrei la khang tangba kin leit sha ki jaka jngohkai pyrthei kum shi bynta ban ai kamai lem ïa ki trai-ri trai-muluk.
Ki heh pulit ha ryngkat bad ki heh ophisar Sorkar na baroh ar tylli ki Jylla kiba la poi ha katei ka jaka naduh dang step, la ïohi ba ki la pyrshang ban tem ïa ka jingkynad ban lait na kino-kino ki jingjia ba sngewsih, hynrei kim lah ban leh eiei bad hap ban shu peit kai katba kitei ki briew jong ki kynhun nongñiah kali na Assam ki pynphai naphang ïa ki kali Meghalaya.
Dei tad haduh ka nohphai sngi, hadien ba u Bah Andrew Myrthong, Additional Deputy Commissioner ka Ri-Bhoi ha ka jingdon ryngkat jong u Bah Orville Massar, Additional Superintendent of Police ka Ri-Bhoi District, ki la ïoh ban ïakren bad ki heh ophisar ka Jylla Assam ha ryngkat bad ki nongïalam jong ki kynhun ñiah kali kamai ba la poi noh sha ka jingïasngewthuh jingmut.
U Bah Andrew Myrthong haba ïakren bad kitei ki heh ophisar ka Assam bad nongïalam jong ki kynhun ñiah kali na Assam, u la pynshai ba kane ka jingkhang ïa ki kali Meghalaya ban rung sha Assam ka ktah shikatdei ïa ki paidbah nongleit nongwan bad ong ruh ba ha man la ki Jylla bad ki ri ka pyrthei, ki don beit wei, ar kiba pynmih jingkulmar bad halor ka jingujor ka jong ki ruh, ka Sorkar kan shimkhia ban pynbeit bad weng ïa kine ki jingeh ha ryngkat bad ka Sorkar Assam.
Na ka liang jong ki nongïalam jong ki kynhun ñiah kali kamai na Assam ruh ki la pynphai ñia da kaba ong ba kane ka jingïakhih ka dei kaba la sdang na Meghalaya ym na Assam bad pynpaw ka jingshah khang jong ki kali kamai na Assam ban leit sha ki jaka jngohkai ha Meghalaya ka la pynbitar shikatdei ïa ki, naba kim ju pynwit satia ïa ki kali Meghalaya ha kine ki sngi bad ki por kiba lah dep.
Shuh shuh kitei ki nongïalam ki la dawa ruh ba ka Sorkar Meghalaya ka dei ban kem bad pynshitom ïa ka kynhun jong ka AKMTTA bad ba ka Sorkar ka dei ban pyntikna lyngba ka jingthoh ba ki nongñiah kali kamai na Assam kin ym shah pyndik shuh haba ki wan sha Meghalaya.
Ban pynbeit ïa kitei ki kynrum kynram, u Bah Andrew Myrthong u la pan por kumba ar sngi na kitei ki kynhun jong ki nongñiah kali ka Jylla Assam ha kaba ki bor Sorkar kiba hakhlieh jong Jylla Meghalaya bad Assam kin ïakren bad pynbeit ïa kane kam bad kyntu ruh ïa ki ba kin ïaishah shipor namar ka jingïakhih bad ka jingmih surok kumne, kan ym poi shano-shano, hynrei kan ktah shi kat dei ïa ki paidbah nongleit nongwan ym tang na ka jylla Assam ne Meghalaya, hynrei na kiwei ki Jylla bad kiba na shabar ri ruh, kiba wan ïaid lyngba kane ka surokbah.
Lyngba ka jinglah jong utei u Majistor ka Ri-Bhoi ban ïakren bad pynsngewthuh, kitei ki kynhun jong ki nongñiah kali na Assam ki la weng noh shuwa shipor ïa katei ka jingïakhih ka jong ki bad la shah biang ïa ki kali na Meghalaya ba kin leit sha Assam khlem da don shuh kano-kano ka jingpynwit.
