Jowai, Nailur 18
Ka All Jaintia Muster Roll Workers & Labour Union (AJMRWLU) ka la pynlong ïa ka jingïalang kut snem kaba tip kum ka 9th Annual General Meeting ha Ïungwalieh ka Dulong ha ka 17 tarik Nailur.
Ha kane ka jingïalang la ïakren bniah halor kiba bun ki mat kiba kongsan kiba ïadei bad ka jingsiew kiba ka Sorkar kan dang hap ban siew kynthup ïa ka ‘arrear’ Variable Dearness Allowance (VDA), RCW nalor kiwei-kiwei ki mat kiba ïadei bad ka jingmyntoi jong ki nongtrei Muster Roll.
U President, Ma Khroo L Pariat ha ka jingkren u kyntu ïa baroh ki nongtrei muster roll ban leit tista ha ki jingtrei bad kyrpad ruh ïa ki tnat Sorkar naduh kiba don ha Shillong haduh kiba don ha District bad Sub Division ba ki dei ban pyntreikam hok ïa ki hukum katkum ba la bthah na ka tnat Personnel, tnat Finance bad Labour jong ka Sorkar Jylla sha baroh kiba trei Muster Roll kiba dei hok ban ïoh ym ban pyntreikam ha ka jingsngew shimet ne ïa kiba don ka jingïadei, ki bahaïing ne dei ka juh ka saiñ pyrthei.
Ula kyntu ruh ïa ka Sorkar Jylla ban ai noh ïa ka RCW bad pynkiew nongsngi sha kito ki Muster roll kiba la trei palat ïa ka san snem kumjuh ka jingsiew bai nongbylla dei ban siew man u bnai kumba la bthah na ka tnat pla tyngka ka Sorkar Jylla.
Ha kane ka jingialang la pynsngewthuh ruh halor ka tynrai bad kumno ban ïada na ka jingpang HIV/AIDs ba la batai da u riew shemphang napoh Meghalaya Aids Control Society, Ma Sandy Tariang.
Ha kane ka jingïalang la pynthymmai ruh ïa ki nongkitkam na ka bynta u snem 2025 – 2027, ha kaba u Bah Khroo L. Pariat u la bat biang kum u President ka seng katba ka Kong Basic Dora Thubru, Bah Phrangsngi Sutnga bad Kong Bniah Sapuh kum ki Vice President, Dayoowanphi Ïakai General Secretary, Wegetwell Ramut, Wandakaru Shullai, Phaibiang Phawa General secretary, bad Alginia Ryngkhlem Finance Secretary.
