Shillong, Nailur 18
Ka Seng Kynthei Lawjynriew ka la pynrem jur ïa ka jingshah leh dusmon i heprit Insaphira Lyngdoh Mawnai, iba dang 4 snem ka rta iba shong ba sah ha Nongrah Nonglum.
Ha ka kyrwoh ba la phah da ka Kong W.Marbaniang, General Secretary, Seng Kynthei Lawjynriew, ka la pynpaw ka jingsngewlem ïa ka ïing ka sem i heprit Insaphira, kyrpang eh ïa ki Kmie/Kpa bad kiba hajan baroh, “ngin buh jingdwai ba U Blei un pyntngen bad ai ka jingsuk ha ka mynsiem ka jong phi baroh kum ka ïing”, la ong ha ka kyrwoh.
“Kum ka Seng Kynthei ngi dap da ka jingsngewkhia bad shon ka mynsiem haba ngi ïohi bad ïohsngew ïa kum kine ki jingjia dusmon kiba la wan jia khah-khah ha ka Ri Khasi baieit jong ngi. Kum ki Kynthei bad ki longkmie ngim don shuh ka jingshngaiñ ha ka ïaid ka ïeng, bad kaba la jia ïa i Insaphira ka pyni ba wat ha phyllaw/ kyrpong ïing lajong ruh ym don jingshngaiñ shuh kata ruh dang step”, la ong ka Kong W.Marbaniang.
“Ngi kyrpad sngewrit ïa kiba don kti ban wan shakhmat bad phla ïa kane ka jingleh dusmon kaba long ka pap ka sang” ka la bynrap.
Ka la ong ba ka Seng lyngba kane ka kyrwoh ka kwah ruh ban pynsngew sha baroh ba kin long kiba peitngor bad adkar ha ka ïaid ka ïeng, namar ym tang ïa ki khynnah khyllung ba kum kine ki kam dusmon ki jia, hynrei wat ïa kiba la san ruh kumjuh. Bad kyrpang ïa kiba dang rit ki khun ki kti ba kin ym bynnud eh ïa ka por ban synran lang ïa ki katba ki lah.
Ka seng ka la ong ruh ba ki nongpynïaid skul ki la hap shim da ki sienjam kiba pyrkhing ïa kiba leit on leit shaw skul. “Ngi ngeit ba ki bor pahara bad bor pulit kin trei shitom haduh ban da lap ïa kine ki riewsniew” la bynrap ka Kong W.Marbañiang ha ka kyrwoh.
Shuh-shuh ka la ong “kum ka ri bad ka jaidbynriew ngi hap ban ïatyllilang kawei khlem kino-kino ki jingsngewpher tang da kawei ka jingmut ban ïakhun pyrshah ïa kine ki kam bymman bad kam dusmon naduh ki Kmie/Kpa, Seng Samla, Seng Kynthei, Dorbar Shnong, Balang, Sorkar, bor pahara bad pulit ban wanrah pat ka jingshngaiñ ha kane ka ri baieit jong ngi.”
