Jowai, Nailur 18
Ka Niam Unitarian, Jowai ka la rakhe ïa ka lyngkhuh ba 138 snem ka jingwan ka niam Unitarian ha rilum Khasi-Jaintia halor ka phang “Ka jingkyrsiew Mynsiem”.
Ïa kane ka sngi kyrpang la rakhe ha ïing mane Unitarian Jowai ha ka jingwan sakhi shitrhem ki hajar ngut ki riew ngeit jong ka niam Unitarian ha ka 18 tarik Nailur.
La sdang ïa ka jingrakhe Anniversary naduh ka por 8.30 baje mynstep da kaba pyndeng syntiew ïa u mot jong u Nongseng Rangbah ïa ka niam Unitarian u Babu Hajom Kissor Singh da u Mynried Shylla bad pynher ruh ïa ka lama da u Moderator GM. Lamar.
Ha ka nohphai sngi ka la don ka jingïaseng paidbah ba la pynïaid da u Moderator H L. Giri uba la thang ruh ïa ka sharak katba ïa ka Kyntu Kynpham la pashat da Teiborlang Passah.
Katba ha ka por janmiet ka la don ka jingïaid proseshon ba la pynïaid ka seng samla ha kylleng ki dong ka sor Jowai da kaba rah ïa ki dongmusa kum ka dak ban pyni sha ka pyrthei ïa ka jingshai mynsiem ba la ïoh pateng na ka jinghikai Niam Unitarian bad la pynhiar ruh ïa ka lama da u Daohipaa Syngkon.
