Shillong, Nailur 18
U General Secretary ka United Democratic Party (UDP) uba dei ruh u MDC ka Sohra, Bah Titosstarwell Chyne ha ka Sngi Palei u la ong ba ka Sohra namarba ka dei ka jaka jngohkai pyrthei kaba pawnam, ka la shah ktah jur na ka jingïakhih ba khlem buh por kaba la khot da ka All Khasi Meghalaya Tourist Taxis Association (AKMTTA) ban pyrshah ïa ka jingwan rung ki ‘Tourist’ taksi na shabar (ka Jylla) sha ki jaka jngohkai kiba don ha ka Jylla.
Katkum ka jingong jong u, ka ïoh ka kot jong ka thaiñ kaba shaniah shi kat dei ha ki kam jngohkai pyrthei, ka mad ïa ka jingduhnong kaba khraw namar ka jingbym don ki nongjngohkai pyrthei. Ki kam khaïi ha ka thaiñ, kynthup ïa ki ‘Hotel’, ki ïingbasa, ki jaka dih sha, bad ki jaka bam ruh ki mad ïa ka jingeh.
Kane ka jingïakhih kaba la sdang dang shen ka la ïalam ruh sha ka jingpyndam noh ïa ki ‘booking’ jong ki nongjngoh kai pyrthei bad ka la ktah shi kat dei ïa ka kamai kajih jong ki briew kiba shaniah ha ki kam jngohkai pyrthei ha Sohra.
Haba kren sha ki nongthoh khubor, u Bah Chyne u la ong ba watla ki jingdawa jong ka AKMTTA ki long kiba shong nongrim hynrei ka rukom ba ki pynpaw ïa kane ka mat kan nang ktah shuh-shuh ïa ki jaka jngohkai pyrthei ha ka Jylla khamtam ïa ka Sohra.
“Ki paidbah jong ka Sohra hadien ba la khang noh ïa ka Mawmluh Cherra Cement Ltd (MCCL) kim don lad shuh da kumwei pat hynrei ki shaniah tylli ha ki kam jngohkai pyrthei na bynta ka lad kamai jong ki. Bun ki ‘riew shimet, ki kynhun bad ki kompeni ki la sdang ïa la ki jong ki ‘Hotel’, ïing-basa da kaba shim ram na ki jaka kynshew pisa bapher-bapher bad ki tnad jngohkai pyrthei jong ka Sorkar. Kumta, lada don ka jingpynthut man ka por kumne, kan ym ktah tang ïa kane ka por hynrei kan ktah ruh ïa ka lawei namarba ki nongjngohkai pyrthei kin sa ngiah bad sngew ba kam long kaba shngaiñ ban wan sha kine ki jaka jngohkai pyrthei namar kin sngew ba kin don shibun ki jingeh ha lynti,” u la ong.
“Dei na kata ka daw, katkum ka jingtip ba la ïoh lum, baroh ki nongjngohkai pyrthei ki la pyndam noh ïa ki ‘Booking’ jong ki,” ong u Bah Chyne da kaba bynrap, “Lada kane ka dang ïai bteng, kan ktah shisha ïa ka ïoh ka kot jong ka thaiñ. Ym tang ba kan ktah ïa ki briew kiba ïadon bynta bad ka kam jngohkai pyrthei, kan ktah ruh ïa ki jaka die sha, ki briew kiba die jingdie ha ki jaka jngohkai pyrthei, ki ‘Dhaba’, ki jaka bam bad kiwei-kiwei.”
Utei u nongïalam ka UDP u la kyrpad ïa ka AKMTTA ban wan sha ka miej ban ïakren, da kaba pdiang sngewbha ïa ka jingkhot ïakren jong ka Sorkar Jylla ha ka 23 tarik u Nailur.
U la pynskhem ruh halor ka jingdonkam ïa ka mat treikam kaba shai ban pynbeit ïa katei ka jingeh, da kaba ai nuksa na kiwei pat ki Jylla kum ka Sikkim bad Odisha, kiba la pyntreikam ïa ki polisi kiba treikam bha ban pynïaid ïa ki ‘Tourist’ taksi.
U Bah Chyne u la ai jingmut ba ka tnad Transport ryngkat bad kiwei-kiwei ki tnad treikam ki dei ban ïadon bynta lang ban wad ïa ka lad ban weng ïa kane ka jingeh. U la ban jur ba ka mat treikam lane ka rukom treikam kaba shai ka long kaba donkam khnang ban lait na kum kine ki jingïa-ka-jia ha ki por ban wan bad ban pyntikna ïa ka jingïaid beit ïaid ryntih jong ki kam jngohkai pyrthei ha ka Jylla.
U MDC u la kyntu ïa ka Sorkar Jylla ban shimkhia halor katei ka jingeh bad ban pyntikna ba kano-kano ka jingïakynduh bad ka AKMTTA kan wanrah ïa ka jingkular ban pynbeit ïa katei ka jingeh.
Katkum ka jingong jong u, ka jingpynbeit ka ban neh slem ka long kaba donkam ban ïada ïa ka jingmyntoi jong ki nongshong shnong bad ki kam jngohkai pyrthei.
“Lada ym don ka mat treikam kaba shai, kane ka jingeh kan sa mih hi. Lada phi ong ba ki kali Assam kim lah ban rung sha Meghalaya te ka Assam ruh kan ong kumjuh. Kumta ka Sorkar ka dei ban shim ïa ka rai,” u la bynrap.
