Shillong, Nailur 18
U State President bad nongmihkhmat ka All India Trinamool Congress (AITC) na Nong-thymmai, Bah Charles Pyngrope u la shah thung kum u ‘Chief Whip’ ka Liang Pyrshah hapoh Ïingdorbar Thaw-aiñ ka Jylla.
“…u Bah Charles Pyngrope, u dkhot jong ka Ïingdorbar Thawaiñ ka Jylla u la shah ithuh da u Lamphang kum u ‘Chief Whip’ ka Liang Pyrshah hapoh ka Ïingdorbar Thawaiñ ka Meghalaya bad kane kan treikam naduh ka 15 tarik u Nailur, 2025,” la ong u Commissioner & Secretary ka Ïingdorbar Thawaiñ, u Andrew Simons ha ka kyrwoh jingpynbna.
Haba pdiang sngewbha ïa ka rai jong u Lamphang, ka AITC ka la ong, “Kane ka dei ka sienjam kaba kongsan ban pynskhem shuh-shuh ïa ka jingdon jong ngi bad ban pynkhlaiñ ïa ka bynta jong ngi ha Meghalaya. Da kane, ngi pynskhem biang ïa ka jingkular jong ngi ban ai sha ki paidbah jong ka Jylla ïa ka Liang Pyrshah kaba khlaiñ, kaba don ka jingkitkhlieh bad kaba pynleit jingmut ha ki paidbah.”
